म. टा. वृत्तसेवा, नवी मुंबई मतदानासाठी सर्वजण व्यग्र असताना तुर्भे स्टोअर्समधील शिवसेना शाखेमध्ये सोमवारी पहाटेच्या सुमारास घुसलेल्या अज्ञात व्यक्तीने तोडफोड केल्याची घटना उघडकीस आली. सोमवारी दुपारी सोशल मीडियावर शाखेतील फोटो व्हायरल झाल्यानंतर ही घटना उघडकीस आली. दरम्यान, पहाटेच्या सुमारास शिवसेना शाखेमध्ये घुसलेल्या गर्दुल्ल्याने हा प्रकार केला असावा, अशी शक्यता व्यक्त करण्यात येत आहे. तुर्भे स्टोअर्स येथे ठाणे-बेलापूर मार्गाला लागूनच शिवसेनेची शाखा आहे. याच शाखेत तोडफोड झाल्याची घटना उघडकीस आली. सोमवारी विधानसभा निवडणुकीसाठी प्रत्यक्ष मतदान असल्याने रात्री उशिरापर्यंत परिसरातील शिवसैनिक व इतर कार्यकर्ते शाखेमध्ये होते. या शिवसैनिकांनी रात्री उशिरा घरी जाताना शाखेला कुलूप न लावल्याने पहाटेच्या सुमारास अज्ञात व्यक्तीने शाखेमध्ये घुसून तोडफोड केली. या तोडफोडीत शाखेतील टीव्ही फुटल्याचा फोटो सोमवारी दुपारी सोशल मीडियावर व्हायरल झाला. याबाबत तुर्भे एमआयडीसी पोलिसांकडे संपर्क साधला असता, कुठल्याच प्रकारची तक्रार आली नसल्याचे पोलिसांकडून सांगण्यात आले.
शाखेत तोडफोड
म टा...
महाराष्ट्र टाइम्स.कॉम 22 Oct 2019, 4:00 am