वाशी ‘पे अॅण्ड पार्क’मध्ये लूट?

एक रुपया परत दिला जात नसल्याचा आरोप

म. टा. वृत्तसेवा, नवी मुंबई

वाशी रेल्वे स्थानकाबाहेरील सिडकोच्या ‘पे अॅण्ड पार्क’मधील असुविधा आणि लुटीबाबत नागरिकांकडून सिडकोकडे तक्रारी करण्यात येत आहेत. पार्किंगचे शुल्क नऊ रुपये असताना १० रुपयांची नोट दिली असता सुट्ट्या पैशाचे कारण सांगत वाहनचालकांचा एक रुपया परत केला जात नसल्याचा आरोप वाहनचालक करत आहेत.

वाशी रेल्वे स्थानकाबाहेर सिडकोने ‘पे अॅण्ड पार्क’ची सुविधा दिली आहे. या ठिकाणी दुचाकीसाठी १२ तासांसाठी वाहन ठेवण्याकरिता नऊ रुपये आकारले जातात. १२ तासांच्या पुढे वेळ झाला तर मग पुढच्या सहा तासांसाठीदेखील नऊ रुपये आकारले जातात. विशेष म्हणजे नऊ रुपये शुल्क असताना प्रत्येकाकडून दहा रुपयेच घेण्यात येतात. एक रुपया सुट्टा नसल्याचे कारण त्यासाठी पुढे केले जाते. एखाद्या वाहनचालकाने एक रुपया परत देण्याची मागणी केली तर त्याला तो देण्यात येतो. मात्र बहुसंख्य वाहनचालकांचा एक रुपया ‘पे अॅण्ड पार्किंग’चे कर्मचारी स्वत:कडेच ठेवून घेतात, असा आरोप वाहनचालक करत आहेत.

या ‘पे अॅण्ड पार्किंग’मध्ये दररोज शेकडो दुचाकी वाहने पार्क केली जातात. त्यामुळे या अतिरिक्त एक रुपयाचा कोणताही हिशोब ठेवण्यात येत नाही. पार्किंगमध्ये सुरक्षेच्या दृष्टीने महत्त्वाचे असणारे सीसीटीव्ही कॅमेरेदेखील नाहीत. त्यामुळे एखाद्या वाहनाची चोरी झाली किंवा वाहनातील पेट्रोलची चोरी होत असल्यास त्याचा शोध घेणे कठीण जाते. वाहनातील पेट्रोलचोरीचे प्रकार येथील ‘पे अॅण्ड पार्क’मध्ये वारंवार होतात. त्याबद्दल येथील कर्मचाऱ्यांना विचारले असता ते उडवाउडवीची उत्तरे देत असल्याचे वाहनचालकांचे म्हणणे आहे. ‘पे अॅण्ड पार्किंग’मधील गैरप्रकारांबद्दल तुषार पाटील या नागरिकाने सिडकोला ईमेल करून कारवाई करण्याची मागणी केली आहे.