भावे नाट्यगृह कात टाकणार

१२ कोटी रुपये खर्चून नूतनीकरणाचा प्रस्ताव

म. टा. वृत्तसेवा, नवी मुंबई

नवी मुंबईची सांस्कृतिक परंपरा जपणाऱ्या नवी मुंबई महापालिकेच्या विष्णुदास भावे नाट्यगृहाचे नूतनीकरण करण्यात येणार आहे. विष्णुदास भावे नाट्यगृहाच्या नूतनीकरणाचा प्रशासकीय प्रस्ताव महापालिका आयुक्त डॉ. रामास्वामी एन. यांच्यामार्फत आगामी महापालिका सर्वसाधारण सभेपुढे सादर केला जाणार असून सर्वसाधारण सभेच्या मंजुरीनंतर नाट्यगृहाचे रूप पालटणार आहे. या नाट्यगृहाच्या नूतनीकरणासाठी १२ कोटी ७९ लाख रुपये खर्च अपेक्षित आहे.

सन १९९६मध्ये सिडकोने बांधलेले विष्णुदास भावे नाट्यगृह नवी मुंबई महापालिकेकडे हस्तांतरित झाल्यानंतर त्याठिकाणी आवश्यक कामे करण्यात आली. तथापि नूतनीकरण करण्यात आलेले नाही. त्यामुळे कलावंतांना व कलारसिकांना उच्च दर्जाचे व अत्याधुनिक सोयी-सुविधांयुक्त नाट्यगृह उपलब्ध होण्याच्या दृष्टीने हा प्रस्ताव सादर करण्यात येणार आहे.

विष्णुदास भावे नाट्यगृह नूतनीकरण कामाचा कलात्मक आराखडा वास्तुविशारद सोपान प्रभू यांच्याकडून तयार करून घेण्यात आला असून त्यामध्ये स्थापत्य व विद्युत कामे तसेच अनुषांगिक कामे करण्यात येणार आहेत.

ज्यामध्ये, अंतर्गत भागातील स्थापत्य कामे, प्रेक्षागृहातील नवीन खुर्च्या बसविणे, नाट्यगृहामधील कलावंत विश्रांती कक्ष व खोल्या तसेच कार्यालयाचे नूतनीकरण करणे, लॉबीचे नूतनीकरण करणे, अग्निशमन यंत्रणा बसविणे, पार्किंग व्यवस्थेचे सुयोग्य नियोजन करण्यात येणार आहे.

तसेच, संरक्षक भिंतीची सुधारणा करणे, दिव्यांग व्यक्तींच्या प्रवेशासाठी बॅरिअर फ्री प्रवेश व्यवस्था करणे, अत्याधुनिक आंतरराष्ट्रीय दर्जाची ध्वनीक्षेपक यंत्रणा बसविणे, अद्ययावत प्रकाशयोजना व्यवस्था करणे, वातानुकूलित व्यवस्थेचे आधुनिकीकरण करणे, ध्वनी व प्रकाश योजना नियंत्रण यंत्रणा बसविणे, कॉस्टिक विषयक कामे करणे, विद्युत, ध्वनी व प्रकाश योजना विषयक कामे करणे अशा वैविध्यपूर्ण गोष्टींचा समावेश आहे. याव्दारे नवी मुंबईची सांस्कृतिक ओळख असणाऱ्या वाशी येथील विष्णुदास भावे नाट्यगृहाला नवे रूप लाभणार असून कलावंत व नाट्यसिकांसाठी ही नवी पर्वणी लाभणार आहे.