म. टा. वृत्तसेवा, जयसिंगपूर
गणेशमूर्ती विसर्जन मिरवणुकीवेळी वेळेचे तसेच आवाज मर्यादेचे उल्लंघन केल्याप्रकरणी कुरुंदवाड पोलिसांनी आलास (ता. शिरोळ) येथील नवजवान गणेशोत्सव मंडळाच्या नऊ कार्यकर्त्यांवर गुन्हा दाखल केला आहे.
पोलिसांकडून मिळालेली माहिती अशी : आलास येथे नवजवान गणेशोत्सव मंडळाने १८ सप्टेंबर रोजी विसर्जन मिरवणूक काढली होती. पोलिसांनी ठरवून दिलेल्या वेळेत मिरवणूक संपविली नाही. रात्री पावणेबारापर्यंत मिरवणूक सुरू होती. याबाबत विचारले असता कार्यकर्त्यांनी पोलिसांशी वाद घातला. आवाजाची मर्यादा ओलांडली. त्यामुळे पोलिसांनी मंडळाचे कार्यकर्ते रोहित मगदूम, रोहन मगदूम, सदाशिव मठपती, शामराव उपाध्ये, मनोज उपाध्ये, अविनाश मगदूम, श्रीपाल मगदूम, अरविंद परीट, विजय परीट (सर्व रा.आलास) यांच्यावर गुन्हा दाखल केला आहे.