- येत्या दोन दिवसांत मान्सून राज्यात येणार
- ८ ते १२ जून रोजी मुंबईत मुसळधार
- उत्तर कोकणातही जोरदार पाऊस
म. टा. खास प्रतिनिधी, मुंबई
विजांच्या कडकडाटासह दमदार आगमन केल्यानंतर मान्सूनपूर्व पावसाने मुंबई परिसरातून काहीशी विश्रांती घेतली असली तरी, नैर्ऋत्य मोसमी पाऊस दारात उभा असल्याची वर्दी मात्र दिली आहे. त्यानुसार मुंबईमध्ये ८ ते १२ जून या काळात अतिवृष्टी होणार असल्याचे भाकित प्रादेशिक हवामान विभागाने केले आहे. मुंबईमध्ये ६ ते ९ जूनदरम्यान जोरदार पावसाचा इशारा स्कायमेटने दिला होता. त्यानंतर मुंबई महापालिकेमध्येही तयारी सुरू झाली होती. या परिस्थितीवर शिक्कामोर्तब करणारा इशारा आता प्रादेशिक हवामान विभागानेही दिला आहे. यासंदर्भात सूचना देणारे पत्रक हवामान विभागाकडून जारी करण्यात आले आहे. या कालावधीमध्ये मुंबईकरांनी गरज नसल्यास घराबाहेर पडू नये, असेही आवाहन करण्यात येत आहे.
येत्या शुक्रवारपासून मुंबईमध्ये पावसाचा जोर वाढण्याचा अंदाज प्रादेशिक हवामान विभागाने वर्तवला आहे. वीकेण्डच्या या दोन दिवसांत दक्षिण कोकणातही मुसळधार पावसाचा अंदाज आहे. गुरुवारीही उत्तर आणि दक्षिण कोकण तसेच गोव्यात काही ठिकाणी जोरदार पाऊस येऊ शकतो. दक्षिण मध्य महाराष्ट्रालाही शनिवारी जोरदार पावसाचा इशारा देण्यात आला आहे. काही ठिकाणी अती तीव्र स्वरूपाच्या सरी उत्तर कोकण, दक्षिण कोकण आणि दक्षिण मध्य महाराष्ट्रात कोसळू शकतात. त्यामुळे या दोन दिवसांमध्ये अत्यावश्यक कामासाठीच घराबाहेर पडा, असे प्रादेशिक हवामान विभागाचे उपमहासंचालक कृष्णानंद होसाळीकर यांनी सांगितले.
बंगालच्या उपसागरात ८ जून रोजी कमी दाबाचा पट्टा तयार होईल. त्याच्या प्रभावामुळे मुंबई, उत्तर कोकणात जोरदार पावसाची शक्यता आहे, अशी माहिती मुंबई प्रादेशिक हवामान खात्याचे शास्त्रज्ञ ई. अजेयकुमार यांनी दिली. पावसाचा हा प्रभाव १२ जूनपर्यंत असेल. मात्र ९ ते ११ दरम्यान पावसाच्या सरींची तीव्रता सर्वाधिक असेल, असे हवामान विभागाने दिलेल्या इशाऱ्यामध्ये नमूद केले आहे. मान्सूनपूर्व पावसानेच दमदार हजेरी लावल्याने ठिकठिकाणी पाणी साचण्याच्या घटना घडल्या. त्यामुळे आता वीकेण्डच्या पावसामध्ये मुंबईतील मान्सूनपूर्व कामांची खरी स्थिती समोर येईल, अशी चर्चा सुरू झाली आहे. सोमवारी तासभराच्या पावसाने आणि वीजांनी अनेकांनी पावसाचा थरार खऱ्या अर्थाने अनुभवला.
० दोन दिवसांत राज्यात पाऊस
बुधवारी उत्तर मध्य महाराष्ट्रात आणि दक्षिण मध्य महाराष्ट्रात सर्वदूर पावसाची शक्यता आहे. तर उत्तर कोकण, दक्षिण कोकण आणि गोव्यामध्ये तसेच मराठवाड्यामध्ये अनेक ठिकाणी पाऊस पडू शकतो. शुक्रवारपासून मराठवाडा, पूर्व आणि पश्चिम विदर्भ येथेही सर्वदूर पावसाचा अंदाज हवामान विभागाने व्यक्त केला आहे. सध्या मान्सून कर्नाटकमध्ये अडकला आहे. मात्र येत्या दोन दिवसांमध्ये तो महाराष्ट्रात दाखल होईल, अशी शक्यता आहे.