म. टा. प्रतिनिधी, मुंबई
लोकलच्या टपावर चढलेला तरुण ओव्हरहेड वायरचा धक्का लागून जखमी झाल्याची घटना गुरुवारी दुपारी मध्य रेल्वेवर मशिद स्थानकात घडली. राकेश (२५) असे त्याचे नाव असून त्याच्यावर सेंट जॉर्ज रुग्णालयात उपचार सुरू आहेत.
गुरुवारी दुपारी १२ वाजण्याच्या सुमारास राकेश मशिद स्थानकात लोकलच्या टपावर चढला. त्यावेळी ओव्हरहेड वायरशी संपर्क होऊन धक्का बसल्याने तो गंभीर जखमी झाला. त्यामुळे मध्य रेल्वेची वाहतूक काही वेळ विस्कळीत झाली होती. राकेश मुंबई सेंट्रल येथे हमाल म्हणून काम करतो. आपण टपावर कसे चढलो, हे आठवत नसल्याचे राकेश याने सांगितले. रुग्णालयात दाखल केल्यानंतर त्याने आडनावही सांगितलेले नाही.