२० झुणका भाकर केंद्रांना पालिकेचे सील

म. टा. वृत्तसेवा, नवी मुंबई

राज्य सरकारची झुणका भाकर योजना बंद झाल्यामुळे झुणका भाकर केंद्रे ताब्यात घेण्याच्या निर्णयाचा पाठपुरावा करताना नवी मुंबई महापालिकेने शहरातील २० झुणका भाकर केंद्रांना सील ठोकले आहे.

महाराष्ट्र सरकारमार्फत सुरू करण्यात आलेल्या झुणका भाकर योजना बंद झाल्यामुळे राज्य सरकारने २७ जून २००० च्या परिपत्राकाद्वारे ही केंद्रे ताब्यात घेण्याबाबत संबंधित प्राधिकरणांना सूचना दिल्या होत्या. तथापि काही झुणका भाकर केंद्र संचालकांनी राज्य सरकारच्या

या निर्णयाविरुद्ध मुंबई उच्च

न्यायालय व सर्वोच्च न्यायालयात याचिका दाखल केल्या होत्या. या याचिकांवर २१ ऑगस्ट २००६ रोजी सुनावणी घेऊन सर्वोच्च न्यायालयाने या याचिका रद्दबातल केल्यामुळे ६ जून २००७ रोजीच्या पत्राद्वारे सरकारने झुणका भाकर केंद्राच्या जागा ताब्यात घेण्याबाबत संबंधित प्राधिकरणांना कळविले होते.

या निर्णयाबाबत ठोस निर्णय घेताना महापालिका आयुक्त तुकाराम मुंढे यांच्या निर्देशानुसार मालमत्ता विभागाने २० झुणका भाकर केंद्रांना सील ठोकण्याची कारवाई केली.

तसेच, दोन ठिकाणी नोटिसाही बजावण्यात आल्या असून एका केंद्रचालकाने ही जागा खासगी असून सिडकोने त्यांना मॅनेस्टी योजनेअंतर्गत दिला असल्याचा दावा केल्याने या जागेबाबत कायदेशीर खातरजमा केली जात आहे. या झुणका भाकर केंद्रांपैकी अनेकांनी व्यवसायात बदल केला असल्याचेही सर्वेक्षणात आढळून आले आहे.