काँग्रेस राष्ट्रवादीने सेनेला इंगा दाखवला, तानाजी सावंतांना धडा शिकवला

उस्मानाबाद : उस्मानाबाद जिल्हा मध्यवर्ती सहकारी बँकेच्या अध्यक्ष उपाध्यक्षपदाच्या निवडणुकीत शिवसेनेला बाजूला करुन काँग्रेस राष्ट्रवादीने एकत्रित सत्ता स्थापन केली आहे. बँकेच्या अध्यक्षपदी काँग्रेसचे बापूराव पाटील तर उपाध्यक्षपदी राष्ट्रवादीचे मधुकर मोटे यांची वर्णी लागली आहे. तीनही पक्षांनी अध्यक्षपदावर दावा सांगितला होता, पण शेवटी माघार घेण्यास कुणीच तयार नसल्याने शिवसेनेला बाजूला सारत काँग्रेस राष्ट्रवादीने अध्यक्ष-उपाध्यक्षदाचा समजदारीने निकाल लावला. शिवसेनेला बाजूला सारल्याने काँग्रेस राष्ट्रवादीने प्रा. तानाजी सावंतांना धडा शिकवल्याची चर्चा जिल्ह्याच्या राजकीय वर्तुळात आहे.

जिकडे सत्ता तिकडे सावंत हे गणित कायमच जिल्हयात आहे. जिल्हा बँकेत शिवसेना ५, काँग्रेस ५, राष्ट्रवादी काँग्रेस ५ जागा निवडून आल्या आहेत. अध्यक्ष पदासाठी आ.सावंत यांचे पुतणे धनंजय सावंत यांचे नाव पुढे असल्यामुळे काँग्रेस राष्ट्रवादी काँग्रेसने ऐनवेळी खेळी करत शिवसेनेला बाजुला ठेवले आहे. प्रा. आ.तानाजी सावंत यांनी जिल्हा परिषदेत केलेल्या राजकीय खेळीचा वचपा या वेळी काढला असल्याची चर्चा आहे.

काँग्रेस राष्ट्रवादीने प्रा. तानाजी सावंतांना धडा शिकवला

जिल्हा परिषदेमध्ये सत्तास्थापन करताना शिवसेनेचे आमदार प्रा. तानाजी सावंत यांच्या गटाने ऐनवेळी काँग्रेस राष्ट्रवादीची साथ सोडून भाजपसोबत घरोबा केला. सत्तेसाठी सावंतांनी केलेल्या गद्दारीचा बदला दोन्ही पक्षांनी घेतल्याचं बँकेच्या अध्यक्ष उपाध्यक्ष निवडीवेळी पाहायला मिळालं.

उस्मानाबाद जिल्हा परिषदेत शिवसेना, काँग्रेस आणि राष्ट्रवादीची सदस्य संख्या जास्त असताना सुध्दा भाजपाची सत्ता आली. शिवसेनेच्या दुसऱ्या गटाने भाजपाशी हातमिळवणी करत महाविकास आघाडीला सत्तेपासून रोखलं होतं. या घडामोडीत मुख्य भूमिका होती ती शिवसेनेचे माजी मंत्री प्रा. आ. तानाजी सावंत यांची... तेव्हापासूनच काँग्रेस राष्ट्रवादी काँग्रेसचा सावंत यांच्यावर रोष होता. त्याचा बदला या निवडणुकीत काँग्रेस राष्ट्रवादीने घेतल्याची चर्चा आहे.

उस्मानाबाद जिल्हा बँकेची निवडणूक महाविकास आघाडीच्या तीनही पक्षांनी एकत्रित लढविली होती. त्यामध्ये महाविकास आघाडीला यश देखील मिळालं. विरोधी भाजप गटाला एकही जागा मिळू न देण्यात आघाडीला यश आलं. आघाडीत बिघाडी करण्याचा मोठा प्रयत्न देखील भाजप नेत्यांनी केला पण हा प्रयत्न महाविकास आघाडीच्या नेत्यानी हाणून पाडला.

निवडणूक बिनविरोध होण्यासाठी तानाजी सावंत यांचा पुढाकार, पण......

जिल्हा परिषदेमध्ये सावंत गटाने भाजपा बरोबर हात मिळवणी केल्यामुळे आपण सत्तेपासून दूर गेलोत हे माहिती असताना सुध्दा शिवसेनेच्या खा.ओमराजे निंबाळकर आ. कैलास पाटील गटाने प्रा तानाजी सावंत यांच्यावर विश्वास ठेवला होता. तरी सुध्दा उस्मानाबाद जिल्हा मध्यवर्ती सहकारी बँकेच्या निवडणुकीत सर्वच्या सर्व १५ जागा भाजपाला सोबत घेत बिनविरोध काढा, यासाठी आमदार सावंत यांनी पुढाकार घेतला पण राजकिय गणित जमत नसल्यामुळे प्रा. आ. तानाजी सावंत यांची राजकीय खेळी यशस्वी होऊ शकली नाही. १५ जागा पैकी ५ जागा बिनविरोध निवडून आल्या उर्वरित १० जागांसाठी निवडणुक लागली. ही निवडणूक प्रा. आ.तानाजी सावंत यांच्यामुळे लागली अशी चर्चा होती.