उस्मानाबादचे शेतकरी घेतायत मोत्याचे उत्पादन, कशी आहे लागवड पध्दत?

उस्मानाबाद : आपण नेहमी ऐकत आलोय की मोती समुद्रात तयार होतात ते खरंय पण आम्ही म्हटलं की मोत्याचे उत्पादन उस्मानाबाद जिल्ह्यातील शेतकरी घेत आहेत, तर तुमचा विश्वास बसेल? पण हे खरंय. मराठवाड्यातील शेतकऱ्यांचा हा पहिलाच प्रयोग आहे. तुळजापुर तालुक्यातील बारुळ येथील दहा तरुणांनी एप्रिल २०१५ मध्ये श्री भवानीशंकर अॅग्रो प्रोड्युसर कंपनी स्थापन केलीय. शेती औजारे, दुग्ध व्यवसायाच्या माध्यमातून त्यांचं काम चालू होते. शेतकरी हा पारंपरिक शेती करतो. शेतीला जोड धंदा केला पाहिजे म्हणजे उत्पन्न वाढेल म्हणून मोत्याचं उत्पादन घेण्याचं त्यांनी ठरवलं.

औरंगाबाद येथील किसान विकास अॅग्रो पर्ल फार्मिंग कंपनीशी करार करुन तरुणांनी मोत्याचे दोन हजार शिंपले शेततळ्यात सोडले. ८५ रुपये दराने हे शिंपले घेतले असून औषध खर्चासहित २ लाखाची गुंतवणुक त्यांनी केलीय. १२ महिण्यानंतर त्या शिंपल्यातील मोती ३६५ रुपये दराने किसान विकास ऍग्रो पर्ल फार्मिंग कंपनीला विकणार आहेत. ३०% नुकसान गृहित धरुन उर्वरित ७०% शिंपल्यातील मोत्याचे ५ लाखाचे उत्पन्न तरुणांना अपेक्षित आहे. २ लाख रुपये गुंतवणुक वजा केली असता ३ लाखांचा निव्वळ नफा त्यांना अपेक्षित आहे. तर त्याच शेततळ्यात मत्स्यपालन करुन दुहेरी उत्पन्न घेण्याचा श्री भवानीशंकर अॅग्रो प्रोड्युसर कंपनीचा मानस आहे.

उस्मानाबाद जिल्हयातील शेतकऱ्यांनी पारंपरिक पिकांबरोबर आधुनिक पध्दतीने आपल्या शेतात प्रयोग करुन उत्पन्न वाढवण्याची गरज असून शासनाच्या वेगवेगळ्या योजनेचा लाभ शेतकऱ्यांनी घेतला पाहिजे. कृषी विभागाकडे संपर्क केल्यास त्यांना सहकार्य करुन त्यांचे उत्पन्न वाढीस मदत करु, असं कृषी अधिकारी अभिमन्यू काशिद यांनी म्हटलं.