४ गावठी पिस्तुलांसह ७ आरोपी ताब्यात, तुळजापूर पोलिसांची मोठी कारवाई

तुळजापूर : गोपनीय माहितीच्या आधारे तुळजापूर शहरातील एक अल्पवयीन मुलगा व एक व्यक्ती अशा दोघांकडे एक गावठी पिस्तूल असल्याची माहिती तुळजापूर पोलिसांना मिळाली होती. त्यानुसार पोलीस अधीक्षक निवा जैन तसेच अप्पर पोलीस अधीक्षक नवनीत काँवत, उपविभागीय पोलिस अधिकारी डॉ सई भोरे पाटील यांच्या मार्गदर्शनाखाली पोलीस निरीक्षक आजिनाथ काशीद यांच्या टीमने पुन्हा बेधडक कारवाई करत एकूण चार गावठी कट्टे पिस्तूल व तीन जिवंत काडतुसे राऊंडसह 7 आरोपींना जेरबंद केलं.

याबाबत प्राप्त झालेल्या माहितीनुसार, 30 डिसेंबर रोजी तुळजापूर शहरापासून काही अंतरावर पाचुंदा तलाव येथून एका अल्पवयीन मुलगा व राजेंद्र सुरेश कांबळे या दोघांकडून एक गावठी पिस्तूल मिळून आली. याप्रकरणी तुळजापूर पोलीस स्टेशन येथे भादवि 465 नुसार गुन्हा दाखल करण्यात आला होता. सदर गुन्ह्याच्या तपासात एकूण पाच आरोपी ताब्यात घेण्यात आले. त्यामधील सचिन खंडू जाधव, शैलेश श्रीकांत नरवडे, मयुर बापू बनसोडे, विश्वजीत विजय अमृतराव, सौरभ दत्तात्रय टोले, या सर्व आरोपींना जेरबंद करण्यात पोलिसांना यश आलं आहे.

पोलिसांनी आरोपींकडून एकूण चार गावठी पिस्तूल व तीन जिवंत काडतूस जप्त केले. या बेधडक कारवाईमुळे तुळजापूर शहरात वाढत्या गुन्हेगारीला आळा बसणार आहे. तुळजापूर पोलीस पथकाच्या कारवाईमध्ये पोलीस निरीक्षक अजिनाथ काशीद ,सहाय्यक पोलीस निरीक्षक सुशील कुमार चव्हाण, सहाय्यक पोलिस निरीक्षक ज्ञानेश्वर कांबळे, पोलीस उपनिरीक्षक राहुल रोटे,पोलीस उपनिरीक्षक बसवेश्वर चंनशेट्टी, यांनी सहभाग नोंदवला.