बंडखोर शिवसेना आमदार ज्ञानराज चौगुले अखेर प्रगटले, उलटसुलट चर्चेला उधाण

उस्मानाबाद : उस्मानाबाद जिल्ह्यातील उमरगा लोहारा मतदारसंघातील शिवसेनेचे बंडखोर आमदार ज्ञानराज चौगुले यांनी सोशल मीडियाच्या माध्यमातून त्यांची बाजू मांडली आहे. माजी आमदार तथा चौगुलेंचे राजकीय गुरू प्रा. रविंद्र गायकवाड यांच्या मार्गदर्शनाखाली आलोय, असा उल्लेख केल्यामुळे प्रा. रविंद्र गायकवाड यांच्याबाबत उस्मानाबाद जिल्ह्यात उलटसुट चर्चेला उधाण आलाय.

शिवसेनेच्या काही आमदारांनी महाविकास आघाडी विरुद्ध बंड करून पक्ष प्रमुख तथा मुख्यमंत्री उद्धव ठाकरे यांना आव्हान दिले आहे. २१ जूनपासून शिवसेनेचे आमदारांनी यांनी सुरत मार्गे गुवाहाटी येथे मुक्काम ठोकलाय. ज्ञानराज चौगुले हे २१ जूनपासुन नाँट रिचेबल होते. आता ते दिसले ते थेट गुवाहाटीमध्येच.

उमरगा लोहारा मतदारसंघातील जनतेच्या विकासासाठी गुवाहाटीला गेल्याचे ते सांगत आहेत. राजकीय गुरु प्रा. रविंद्र गायकवाड आणि गटनेते एकनाथ शिंदे यांच्या मार्गदर्शनाखाली आल्याचे ते सांगत आहेत. गेल्या ३० वर्षांपासून मी शिवसेनेचा भगवा झेंडा घेवून वंदनीय बाळासाहेब ठाकरे यांच्या विचाराने पुढे जात आहे. कुणाच्याही दबावाखाली आलेलो नाही, असे चौगुले म्हणाले. इथे आल्यानंतर मी कुणाच्याही संपर्कात नाही. मतदारसंघातील जनतेच्या विकासासाठी मी आलो आहे. यामुळे उमरगा आणि लोहारा तालुक्यातील आणि महाराष्ट्रातील जनतेने गैरसमज करून घेऊ नये. आम्ही सर्वजण इथे आमच्या स्वतःच्या विचारांनी आलो आहोत. कुणाच्याही दबावाला बळी पडून आलेलो नाही, असे चौगुले यांनी स्पष्ट केले.

शिवसेना आमदाराला मिळाले एकनिष्ठेचे फळ, उद्धव ठाकरेंनी दिली ही मोठी भेट

प्रा. रविंद्र गायकवाड हे शिवसेनेचे आमदार होते. खासदार होते. उमरगा लोहारा मतदारसंघात त्यांना मानणारा मोठा मतदार आहे. बंडानंतर आपण शिवसेनेसोबत असल्याचे चौगुले यांनी जाहीर केले. पण राजकीय गुरु प्रा. रविंद्र गायकवाड यांच्या मार्गदर्शनाखाली येथे आलोय, असं ज्ञानराज चौगुले यांनी म्हटलंय. यामुळे अनेकांच्या भुवया उंचावल्या आहेत.

एकीकडे शिवसेनेचा वाद कोर्टात, तर दुसरीकडे बंडखोरांविरोधात शिवसैनिक रस्त्यावर