पब्जीच्या नादात इमारतीवरून पडून मुलगा जखमी

म. टा. वृत्तसेवा, पालघर ः पब्जी खेळण्याच्या नादात १६ वर्षांचा मुलगा इमारतीच्या दुसऱ्या मजल्यावरून खाली पडून गंभीर जखमी झाल्याची घटना शिरगाव येथे घडली. शादान शेख असे त्याचे नाव असून त्याला उपचारासाठी पालघर येथील खासगी रुग्णालयात दाखल करण्यात आले आहे.

पालघरमध्ये पब्जी खेळत असताना शादान हा दुसऱ्या मजल्यावरून खाली पडला. विशेष म्हणजे, या इमारतीचे बांधकाम सुरू आहे. इमारतीवरून हा मुलगा पडल्याचे कळताच त्याला तातडीने पालघर येथील खासगी रुग्णालयात दाखल करण्यात आले. पालघरपासून सात किलोमीटर अंतरावरील समुद्रकिनाऱ्यालगत असलेल्या शिरगावात ही धक्कादायक घटना घडली.

बंदीला हरताळ?

पब्जीच्या विळख्यात तरुण अडकत असल्याचे लक्षात आल्यानंतर त्यावर बंदी लागू करण्यात आली. मात्र, तरीही हा खेळ उपलब्ध होत असून तरुण भान विसरून त्याच्या आहारी जात आहेत. त्यामुळेच बंदीच्या निर्णयाची तांत्रिकदृष्ट्या कडक अमलबजावणी करण्याची गरज व्यक्त होत आहे.