ट्रकची दुचाकीला धडक, भीषण अपघातात शाळेसाठी निघालेल्या दोन शिक्षकांचा जागीच मृत्यू

परभणी: कल्याण ते निर्मल राष्ट्रीय महामार्गावर भरगाव ट्रकने दुचाकीला धडक दिल्यामुळे शाळेकडे निघालेल्या दोन शिक्षकांचा जागीच मृत्यू झाला आहे. ही घटना परभणीच्या मानवत शहरामध्ये घडली आहे. अपघाताची माहिती मिळताच नागरिकांनी घटनास्थळी एकच गर्दी केली होती. तर ट्रकच्या चालकाने घटनास्थळावरून पळ काढला आहे. घटनेची माहिती मिळतात पोलिसांनी घटनास्थळी भेट देऊन पाहणी केली आहे.

परभणीच्या मानवत शहरातील शकुंतला विद्यालयातील शिक्षक रामेश्वर कदम आणि गंगाधर राऊळ हे दुचाकी क्रमांक एम एच २२ एएच ७०३१० क्रमांकाच्या दुचाकीवरून शाळेकडे सकाळी जात होते. कल्याण ते निर्मल राष्ट्रीय महामार्गावरून पाथरीवरून परभणीला जाणाऱ्या एमएच १३ आर ३६८४ या भरधाव ट्रकने त्यांच्या दुचाकीला मानवत शहराजवळ जोराची धडक दिली. या अपघातामध्ये दुचाकीवरील दोन्ही शिक्षकांचा जागीच मृत्यू झाला. अपघात झाल्यानंतर ट्रक चालकाने घटनास्थळावरून पळ काढला आहे.

दहावीचा पेपर सुरु असतानाच मुलीच्या हातात 'लग्नाच्या बेड्या'; बीडमध्ये आणखी एक बालविवाह
दरम्यान, अपघाताची माहिती समजतात मानवत शहरातील नागरिकांनी घटनास्थळी एकच गर्दी केली आहे. अपघातामध्ये दोन शिक्षकांचा मृत्यू झाला असल्याने हळहळ व्यक्त केली जात आहे. यासोबतच घटनेची माहिती मिळताच पोलिसांनी घटनास्थळी भेट देऊन पाहणी केली आहे. तर दोन्ही शिक्षकांचे मृतदेह शवविच्छेदनासाठी मानवत येथील रुग्णालयामध्ये पाठवण्यात आले आहेत. हे वृत्त लिहीपर्यंत याप्रकरणी कुठल्याही प्रकारची नोंद मानवत पोलीस ठाण्यामध्ये करण्यात आलेली नव्हती. दरम्यान मागील काही दिवसापासून परभणी जिल्ह्यामध्ये अपघाताचे प्रमाण वाढले आहे. वाहनधारक आपल्या ताब्यातील गाड्या निष्काळजीपणाने चालवत असल्याने अनेक निष्पापांना आपला जीव गमवावा लागत आहे.