आईच्या डोळ्यांदेखतच तरुण मुलाचा मृत्यू; परभणीत घडली काळीज पिळवटून टाकणारी घटना

परभणी: सेलू तालुक्यात एक काळीज पिळवटून टाकणारी घटना घडली आहे. आईच्या डोळ्यांदेखतच २२ वर्षीय तरुण मुलाचा मृत्यू झाला आहे. या घटनेने संपूर्ण गाव हादरले आहेत. तर, मयत तरुणाच्या आईचा आक्रोश पाहून गावकरीही सुन्न झाले आहेत. (Parbhani News Today)

नवरात्रीचा सण असल्याने आईसोबत कपडे धुण्यासाठी नदीवर गेलेल्या २२ वर्षीय मुलाचा पाय घसरून खड्ड्यात पडून मृत्यू झाला आहे. आईच्या डोळ्यांदेखतच ही घटना घडली आहे. परभणीच्या सेलू तालुक्यातील मोरेगाव येथे हा प्रकार घडला आहे. रवी प्रकाश काकडे असे मृत्यू झालेल्या मुलाचे नाव असून या घटनेमुळे मोरेगाव येथे हळहळ व्यक्त केली जात आहे.

वाचाः शाळांमध्ये सरस्वती, शारदेचे फोटो हवेत कशाला?: छगन भुजबळ यांचे वक्तव्य

सेलू तालुक्यातील मोरेगाव येथील रवी प्रकाश काकडे हा नवरात्रोत्सव सुरू असल्याने आपल्या आईसोबत गावा शेजारून होणाऱ्या दुधना नदीपात्रामध्ये कपडे धुण्यासाठी गेला होता. अशातच निम्नदुधना प्रकल्प १०० टक्के भरला असल्याने नदीपात्रात पाण्याचा विसर्ग मोठ्याप्रमाणात केला जात आहे. त्यामुळे दूधना नदी ओसंडून वाहत आहे. दरम्यान, आईसोबत कपडे धूत असताना रवीचा तोल गेला व तो नदीतील खड्ड्यामध्ये जाऊन पडला.

वाचाः नाशिकच्या अंजनेरी पर्वतावर सापडली अतिदुर्मिळ वनस्पती; अशी आहेत वैशिष्ट्ये

कपडे धूत असलेल्या आईने मुलगा खड्ड्यात पडल्याचे पाहून आरडाओरड केला. यावेळी जमलेल्या ग्रामस्थांनी दुधना नदीपात्रात उतरून रवी याचा शोध घेऊन त्याला बाहेर काढले. त्यानंतर उपचारासाठी त्याला सेलू येथील उपजिल्हा रुग्णालयामध्ये दाखल करण्यात आले. यावेळी वैद्यकीय अधिकाऱ्यांनी रवी याला तपासून मृत घोषित केले. आईच्या डोळ्यांसमोरच रवीचा मृत्यू झाल्याने गावामध्ये हळहळ व्यक्त केली जात आहे. तर या घटनेमुळे काकडे कुटुंबावर दुःखाचा डोंगर कोसळला आहे.

वाचाः कोथिंबीरची जुडी १०० रुपयांच्या घरात; पावसामुळे सणासुदीत वाढले भाज्यांचे भाव