पत्नीच्या चेहऱ्यावर फेकली गॅसवरील उकळती मच्छिची भाजी, परभणीत घडला भयंकर प्रकार

परभणी : पत्नीवर संशय घेऊन पतीने गॅसवर उकळत असलेली मच्छिची भाजी पत्नीच्या तोंडावर फेकली. परभणीच्या मानवत तालुक्यातील खडकवाडी येथे ही घटना घडली आहे. परभणी जिल्हा सामान्य रुग्णालयामध्ये उपचार सुरू असताना पत्नीने दिलेल्या तक्रारीवरून पती विरोधात गुन्हा दाखल करण्यात आला आहे. पतीने तोंडावर भाजी फेकल्यामुळे पत्नीचा चेहरा सहा टक्के भाजला आहे. घटनेचा अधिक तपास पोलीस करत आहेत.

मानवत तालुक्यातील खडकवाडी येथील पूजा अर्जुन लंगडे (२५) या आपल्या कुटुंबासह राहतात. पूजा ह्या ८ ऑगस्टला संध्याकाळी ६ वाजण्याच्या सुमारास नेहमीप्रमाणे घरात स्वयंपाक करत होत्या. गॅसवर मच्छिची भाजी ठेवली आणि भाकरी करत असताना पती अर्जुन लंगडे हा घरी आला. त्याने पत्नीला शिवीगाळ करायला सुरवात केली. वाद वाढतच गेल्याने पती अर्जुनने पत्नीच्या चेहऱ्यावर गॅसवरील मच्छिची गरम भाजी टाकून शिवीगाळ केली.

गरम भाजी चेहऱ्यावर पडल्याने आरडाओरड केल्यानंतर सासू-सासरे घरात आले. त्यांनी पती अर्जुनला बाजूला केले. गरम भाजी चेहऱ्यावर पडल्याने पूजा गंभीर जखमी झाल्या. चेहऱ्याची आग थांबत नसल्याने सासू-सासऱ्यांनी मानवत येथील खासगी दवाखान्यात उपचारासाठी नेऊन परत घरी आणले. दुसऱ्या दिवशी ९ ऑगस्टला सकाळी कार्यक्रमानिमित्त सासू-सासरे बाहेर गावी गेले होते. घरी पती-पत्नी दोघेच असताना पती अर्जुनने आज तुला फाशी देऊन मारतो, अशी धमकी पत्नी पूजाला दिली. घरी कोणी नसल्याने आणि भीती वाटत असल्याने अखेर कुणालाही न सांगता पूजा यांनी आपले माहेर गाठले.

नदीत सुरू होता पाण्याचा विसर्ग, त्यात जे वाहत आले ते धक्कादायक, पोलिसांनीही घेतली धाव

पूजाने वडिलांना झालेला सर्व प्रकार सांगितल्यानंतर वडिलांनी परभणी येथील शासकीय दवाखान्यात उपचारासाठी तिला दाखल केले. शासकीय दवाखान्यात तिच्यावर उपचार सुरू आहेत. उपचार सुरू असताना पूजा लंगडे यांनी दिलेल्या तक्रारीवरून पती अर्जुन लंगडेविरोधात याप्रकरणी गुन्हा दाखल करण्यात आला आहे. अधिक तपास पोलीस उपनिरीक्षक अशोक ताठे हे करत आहेत.

सावधान! मोबाईल अ‍ॅपमधून कर्ज घ्यायला गेला आणि फसला; वैतागलेल्या तरुणाने अखेर...