गहू काढताना मळणी यंत्रात अडकले महिलेचे केस, पुढं जे घडलं ते धक्कादायक...

परभणी : परभणी जिल्ह्यातील जिंतूर तालुक्यातील सांगळेवाडी येथे गहू काढताना निलावंती सांगळे (वय 60 वर्ष) या महिलेचे केस मळणी यंत्रात अडकून केस उपटल्याची घटना समोर आली आहे. सुदैवाने या घटनेमध्ये महिलेचे प्राण वाचले आहेत. महिलेवर जिंतूर येथे प्राथमिक उपचार पुढील उपचारासाठी परभणी जिल्हा रुग्णालयात हलविण्यात आले आहे.

सध्या ग्रामीण भागात सर्वत्र गहू, ज्वारी, हरभरा आदी पीकं काढणीची लगबग सुरु आहे. पीकांची काढणी सुरु असल्याने मजुर मिळणे कठीण झाले आहे. तर मजुरीचे दरही वाढलेले असल्यामुळे सर्वसामान्य शेतकऱ्यांच्या कुटुंबातील घरातीचे सर्वजण कामाला लागले आहेत. यामध्ये घरातील महिलाही कामात व्यस्त आहेत. घरकाम करून शेतातील कामांनाही महिला हातभार लावत आहेत. अशातच परभणी जिल्ह्यातील जिंतूर तालुक्यातील सांगळेवाडी येथील निलावंती सखाराम सांगळे या घरचा शेतातील गहू काढत असताना अचानक मळणी यंत्रात डोक्यावरील केस अडकल्याने गंभीर जखमी झाल्या आहेत.

मळणी यंत्रात केस अडकल्याने कुटुंबीयांच्या हृदयाचा ठोका चुकला. नातेवाईकांनी त्वरित त्यांना जिंतूर शहरातील ग्रामीण रुग्णालयात उपचारासाठी दाखल केले. मात्र डोक्यावरील संपूर्ण केस उपटल्यामुळे रक्तस्त्राव होत होता. यामुळे प्रथोपचार करुन पुढील उपचारासाठी जिल्हा रुग्णालयात पाठवण्यात आले आहे.