शेत घ्यायचंय माहेरहून १० लाख आण...; पती, सासरा आणि दिराने महिलेसोबत केले अमानुष कृत्य

परभणी: शेती घेण्यासाठी माहेरून दहा लाख रुपये आण म्हणून पती, सासरा आणि दिराने स्टाफ नर्स असलेल्या एका २६ वर्षीय विवाहितेला शिवीगाळ करत मारहाण केल्याची धक्कादायक घटना घडली आहे. याप्रकरणी नानलपेठ पोलीस ठाण्यामध्ये सासरच्या मंडळी विरोधात गुन्हा दाखल करण्यात आला आहे. हनुमान आनंदा रावणे, शशिकला आनंदा रावणे, आनंदा सखाराम रावणे, विनोद आनंदा रावणे असे गुन्हा दाखल झालेल्या आरोपीचे नावे आहेत.

परभणी शहरातील बाळासाहेब ठाकरे नगरमध्ये राहणाऱ्या आरती हिचा विवाह हनुमान आनंदा रावणे रा. हाताळा तालुका सेनगाव जिल्हा हिंगोली यांच्यासोबत २५ जून २०२० रोजी झाला होता. विवाह झाल्यानंतर पंधरा दिवस आरती आणि पती हनुमान हे हाताळा येथे राहिले त्यानंतर दोघेजण पुणे येथे एका खासगी रुग्णालयात स्टाफ नर्स म्हणून काम करत होते.

वाचाः मुंबई ते कराची व्हाया दुबई; कुर्ल्यातून २० वर्षांपूर्वी बेपत्ता झालेली महिला पाकिस्तानात सापडली

तीन महिन्यानंतर विवाहिता आरती आपल्या पतीसोबत सासू-सासर्‍यांना भेटण्यासाठी हाताळा येथे येत होती. याच दरम्यान सासू शशिकला रावणे यांनी शेती घेण्यासाठी माहेरहून दहा लाख रुपये घेऊन ये, असे सांगून विवाहितेला उपाशीपोटी ठेवून परभणी येथे माहेरी पाठवले. मात्र माझे वडील खासगी तत्त्वावर शिपाई म्हणून काम करतात आणि दहा लाख रुपये कुठून घेऊन येऊ, असे विवाहितेने सांगितले. त्यावर तू पैसे आणलेस तरच तुला नांदवीन असे सासूने सांगितले.

मात्र, यानंतर पती विवाहिता आरतीला वडिलांशी फोनवर देखील बोलू देत नव्हता. यासोबतच दररोज दारू पिऊन येऊन शेत घेण्यासाठी दहा लाख रुपये आण म्हणत विवाहितेला शिवीगाळ करत लाथा बुक्क्यांनी मारहाण करू लागला. त्यासोबतच सासरा आनंदा रावणे, दिर विनोद रावणे यांनी देखील विवाहितेला शिवीगाळ करत मारहाण केली. वेदना असह्य झाल्याने विवाहितेने परभणी येथील माहेरी वास्तव्यास आली. यादरम्यान परभणी येथील भरोसा सेलकडे विवाहितेने तक्रार केली मात्र तडजोडी अंती तोडगा न निघाल्याने विवाहितेने पोलीस ठाणे गाठून तक्रार दिली आहे. त्यावरून हनुमान आनंदा रावणे, शशिकला आनंदा रावणे, आनंदा सखाराम रावणे, विनोद आनंदा रावणे यांच्या विरोधात गुन्हा दाखल झाला आहे.
वाचाः तीन वर्षांपासून १६ वर्षांच्या मुलासोबत घडत होता किळसवाणा प्रकार; पालकांना समजताच बसला धक्का