पोलिसांच्या पथकाला मिळाली गुप्त माहिती; दर्गा मोहल्ला येथे छापा टाकताच हाती लागले घबाड

परभणी : सहाय्यक पोलीस अधीक्षक अबिनाश कुमार यांच्या पथकाला मिळालेल्या गुप्त माहितीच्या आधारे पोलिसांनी पाथरी शहरातील दर्गा मोहल्ला येथे छापा टाकला. या छाप्यावेळी पोलिसांनी १ लाख ६० हजार २७० रुपयांचा अवैध गुटखा जप्त केला आहे. याप्रकरणी ५ जणांविरोधात पाथरी पोलीस ठाण्यामध्ये गुन्हा दाखल करण्यात आला आहे. बाबर अब्दुल रहेमान अन्सारी, मुन्वर खलील कुरेशी, फयुम अन्सारी अब्दुल अलीम, माधव नवले, शेख वाजेद उर्फ मुन्ना शेख शफी अशी गुन्हा दाखल झालेल्या आरोपींची नावे आहेत.

पोलिसांचे पथक अवैध धंद्यांची माहिती काढत गस्त घालत असताना त्यांना दर्गा मोहल्ला येथील एका इसमाच्या घरात गुटखा साठवून ठेवला असल्याची माहिती मिळाली. पोलिसांनी या माहितीच्या आधारे छापा टाकला. घराची झडती घेतली असता त्यामध्ये राजनिवास, प्रिमिअम एक्सएल, जाफरानी जर्दा, विमल पान मसाला, विमल तंबाखू, आरएमडी आदी १ लाख ६० हजार २७० रुपये किंमतीचा गुटखा आढळून आला. सदर मुद्देमालाबाबत अधिक विचारणा केली असता इतर आरोपींची माहिती मिळाली. संबंधितांनी गुटखा कोणाकडून खरेदी केला, याविषयी देखील माहिती दिली.

मोठी बातमी: मिठी नदीत दोन तरुण बुडाले, अग्निशमन दलाचे बचावकार्य, एकाचा मृतदेह सापडला

पोलिसांनी या कारवाईत अवैध गुटखा आणि इतर साहित्य मिळून १ लाख ८४ हजार ७७० रुपयांचा मुद्देमाल जप्त केला आहे. सहाय्यक पोलीस अधीक्षक अबिनाश कुमार, पोलीस कर्मचारी शेख ताजोद्दीन, लोणचणे, झाडे यांच्या पथकाने कारवाई केली. या प्रकरणी पोलीस कर्मचारी अशोक झमकडे यांच्या फिर्यादीवरुन बाबर अब्दुल रहेमान अन्सारी, मुन्वर खलील कुरेशी, फयुम अन्सारी अब्दुल अलीम, माधव नवले, शेख वाजेद उर्फ मुन्ना शेख शफि यांच्यावर पाथरी पोलीस ठाण्यात गुन्हा नोंदवण्यात आला असून पोलीस अधिक तपास करत आहेत.