महाराष्ट्रातील या गावात सुरु आहे अर्ध नग्न होऊन बोंबमारो आंदोलन; कारण वाचून थक्क व्हाल

परभणी : परभणीच्या पूर्णा तालुक्यातील माहेर गावात ग्रामस्थांना मूलभूत सुविधा मिळत नसल्याने ग्रामस्थांनी अख्खं गावच विक्रीला काढलं आहे. ५०० लोकसंख्या असलेल्या या गावात अनेक प्रकारच्या मूलभूत सुविधा नाहीत, शाळकरी मुलांना शाळेत जाण्यासाठी पक्का रस्ता नाही, मुलांना रोज चिखलातून वाट काढत पाण्यातून शाळेत जावं लागत आहे. ग्रामस्थांनी अखेर चार दिवसांपूर्वी अख्खं गावच विक्रीला काढले आहे.

असं असताना देखील अजूनही प्रशासनाने याची दखल घेतली नसल्याने ग्रामस्थ आक्रमक झाले आहेत. ग्रामस्थांनी काल थाळीनाद आंदोलन केले तर आज अर्धनग्न होऊन बोंबमारो आंदोलन केले आहे. प्रशासनाला जर जाग येत नसेल तर रस्त्याच्या प्रश्नासाठी अधिक तीव्र आंदोलनाचा इशारा यावेळी ग्रामस्थांनी दिला आहे.

मोठ्या पगाराची नोकरी सोडून 'ती'ने गावात फुलविली शेती; गावकऱ्यांनाही दाखवला रोजगाराचा मार्ग!
पूर्णा तालुक्यातील माहेर गावाला जोडणारा तीन किलोमीटरचा रस्ता नसल्याने ग्रामस्थांनी पूर्णा तहसीलदारांना निवेदन देऊन गाव विक्रीला काढले आहे. तर आमच्या गावाला स्वतंत्र राज्याचा दर्जा द्यावा अशी मागणी देखील करण्यात आली आहे. रस्त्यासाठी विविध पद्धतीने ग्रामस्थ आंदोलन करत आहेत. मात्र, चार दिवस झाले असले तरी प्रशासनातील अधिकारी लोकप्रतिनिधी गावाकडे फिरकले नाहीत. त्यामुळे माहेर ग्रामस्थ आक्रमक झाले असून प्रशासनाचे लक्ष वेधण्यासाठी ग्रामस्थांनी चौथ्या दिवशी अनोख्या पद्धतीने लहान मुलांसह अर्धनग्न होऊन बोंबमारो आंदोलन केले आहे.

रस्त्यासाठी ग्रामस्थांनी आमच्या पद्धतीने बोंबमारो आंदोलन केल्यानंतर तरी आता प्रशासनातील अधिकारी आणि लोकप्रतिनिधींना जाग येणार का? असा प्रश्न उपस्थित केला जात आहे. गंगाखेड विधानसभेचे आमदार आणि जिल्ह्याचे खासदार महेश ग्रामस्थांची भेट घेऊन यावर तोडगा काढणार का हे पाहणे देखील आता महत्त्वाचे ठरणार आहे.