नोकरीच्या आमिषाने बारा लाखांचा गंडा

म. टा. प्रतिनिधी, पुणे

परदेशात मोठ्या पगाराची नोकरी लावून देण्याच्या आमिषाने ११ जणांनी ११ लाख ७० हजार रुपयांची फसवणूक केल्याचा प्रकार समोर आला आहे. या प्रकरणी शिवाजीनगर पोलिस ठाण्यात दोघांच्या विरोधात फसवणुकीचा गुन्हा दाखल करण्यात आला आहे.

योगेश अप्पासाहेब जाधव (वय ३१) यांनी तक्रार दिली आहे. त्यावरून कांचन मुदगल, परेश मोहनलाल पांडे या दोघांवर गुन्हा दाखल करण्यात आला आहे. पोलिसांनी दिलेल्या माहितीनुसार, शिवाजीनगर येथील ठुबे पार्क येथे मुदगल आणि पांडेचे जॉब कन्सल्टन्सीचे कार्यालय आहे. त्याने परदेशात चांगल्या पगाराची नोकरी मिळवून देण्यात येईल अशी जाहिरात दिली होती. त्यामुळे अनेकांनी त्याच्यांशी संपर्क साधला होता. त्यावेळी परदेशात सुतारकाम, लॅब असिस्टंट अशा स्वरूपाची नोकरी दिली जाईल. परदेशात किमान दोन लाख रुपये तरी पगार मिळेल असे आमिष दोघांनी दाखविले होते. जाधव यांनी यासाठी मुदगल आणि पांडेला एक लाख १० हजार रुपये दिले होते. अशा प्रकारे ११ जणांनी मिळून ११ लाख ७० हजार रुपये भरले. जुलै २०१७ ते मार्च २०१८ पर्यंत त्यांनी परदेशात नोकरी मिळेल यासाठी वाट पाहिली. या दोघांकडे अनेकदा चौकशी केली, त्यावेळी त्यांनी तेथे जागा उपलब्ध झाली की त्वरीत पाठवले जाईल असे त्यांना सांगण्यात येत होते. हे सर्वजण होळीच्या दिवशी ठुबे पार्क येथील कार्यालयात चौकशीसाठी गेले असता, तेव्हा कार्यालय बंद होते. त्यामुळे त्यांनी शिवाजीनगर पोलिस ठाण्यात धाव घेऊन तक्रार दिली.