म. टा. प्रतिनिधी, पुणे
मध्य रेल्वेच्या पुणे विभागात गेल्या दहा महिन्यांत दोन लाख ३४ हजार फुकट्या प्रवाशांकडून १३ कोटी १० लाख ३३ हजार रुपयांचा दंड वसूल करण्यात आला आहे. त्यामध्ये सहा कोटी ३२ लाख ८२ हजार रुपयांचा दंड विनातिकीट प्रवास करणाऱ्या आणि उर्वरित दंड प्लॅटफॉर्म तिकीट न काढता रेल्वे स्टेशनमध्ये प्रवेश केल्याप्रकरणी वसूल करण्यात आला आहे.
रेल्वे प्रशासनाकडून ही मोहीम दर वर्षी राबविली जाते. मात्र, फुकट्या प्रवाशांना पूर्णपणे जरब बसत नसल्याचे दिसून येते. त्यामुळे या पुढे विनातिकीट प्रवास करणाऱ्यांचे नाव, पत्ता, फोटो, फोन नंबर आदी सर्व माहिती घेऊन त्याचे रेकॉर्ड तयार केले जाणार असल्याचे रेल्वे प्रशासनाने स्पष्ट केले आहे.
पुणे विभागातर्फे एप्रिल २०१७ ते जानेवारी २०१८ या दहा महिन्यांत पुणे, बारामती, मिरज आणि कोल्हापूर या ठिकाणी विशेष तिकीट तपासणी मोहिम राबविण्यात आली होती. या मोहिमेमध्ये एकूण दोन लाख ३४ हजार प्रवासी दोषी आढळले. या कारवाईमध्ये पुणे-लोणावळा या मार्गावर प्रवास करणाऱ्या प्रवाशांवर सर्वाधिक कारवाई करण्यात आली. पुणे विभागाचे व्यवस्थापक मिलिंद देऊस्कर, वाणिज्य व्यवस्थापक (वरिष्ठ) कृष्णात पाटील, प्रफुâल्ल चंद्रा यांच्या सूचनेनुसार ही कारवाई करण्यात आली.