मुख्यमंत्री देवेंद्र फडणवीस यांनी केली अमेरिकेत पाहणी
म. टा. प्रतिनिधी, पुणे
पुणे-मुंबई दरम्यानच्या अतिवेगवान प्रवासासाठी 'हायपरलूप' तंत्रज्ञानाचा विकास करण्यासाठी 'व्हर्जिन हायपरलूप वन'चे इंजिनीअर लवकरच पुण्यात येणार आहेत. पुणे महानगर प्रदेश विकास प्राधिकरणाने (पीएमआरडीए) चाचणी ट्रॅकच्या निर्मितीसाठी १५ किलोमीटरचा मार्ग निश्चित केला आहे.
मुख्यमंत्री देवेंद्र फडणवीस यांनी शनिवारी अमेरिकेतील लास वेगास येथे 'व्हर्जिन हायपरलूप'तर्फे सुरू असलेल्या चाचणी ट्रॅकची पाहणी केली. 'हायपरलूप' या क्रांतिकारक तंत्रज्ञानामुळे द्रुतगती महामार्गावरील वाहतूक कोंडी आणि अपघातांची संख्या लक्षणीयरित्या कमी होईल, असा दावा फडणवीस यांनी 'ट्विट'च्या माध्यमातून केला आहे. तसेच, हायपरलूपचे तंत्रज्ञ लवकरच पुण्यात येणार असून, पुणे-मुंबई दरम्यानच्या प्रायोगिक स्वरूपातील ट्रॅकच्या निर्मितीसाठी १५ किमी मार्ग 'पीएमआरडीए'कडून तयार करण्यात येणार असल्याचे स्पष्ट संकेत त्यांनी दिले. 'हायपरलूप'च्या निर्मितीसाठी लागणारी ७० टक्के साधने आणि यंत्रसामग्री राज्यातच उपलब्ध असल्याचा दावा मुख्यमंत्र्यांनी केला. हायपरलूपमुळे हरित वायू उत्सर्जनामध्ये प्रतिवर्षी दीड लाख टन घट होण्याची शक्यता असल्याचेही त्यांनी नमूद केले.
राज्यात विविध उद्योग प्रकल्पांना चालना देण्यासाठी झालेल्या 'मॅग्नेटिक महाराष्ट्र' प्रदर्शनामध्येच 'पीएमआरडीए' आणि 'व्हर्जिन हायपरलूप' यांच्यामध्ये करार झाला होता. हा करार होण्यापूर्वी 'व्हर्जिन'ने केलेल्या प्राथमिक पाहणीनुसार पुणे-मुंबई दरम्यान 'हायपरलूप'द्वारे प्रवासी आणि मालवाहतूक सेवा देता येणे शक्य असल्याचे पूर्व-व्यवहार्यता अहवालात स्पष्ट करण्यात आले होते. त्यानंतर, सरकारने त्याचा इरादा जाहीर केला असून, येत्या ऑगस्टपर्यंत त्याचा व्यवहार्यता अहवाल तयार केला जाणार आहे. 'हायपरलूप'मुळे पुणे-मुंबई प्रवासाचे अंतर २५ मिनिटांपर्यंत कमी होऊ शकण्याचा अंदाज आहे.
............
ट्रॅक बालेवाडी ते गहुंजेदरम्यान?
'पीएमआरडीए' आणि 'हायपरलूप वन' यांच्यात झालेल्या करारानुसार २०२१ पर्यंत १० ते १५ किमीच्या चाचणी ट्रॅकची निर्मिती करण्याचे निश्चित करण्यात आले आहे. या चाचणी ट्रॅकच्या निर्मितीसाठी सलग जागा लागणार असल्याने त्याबाबत विविध पर्याय सुचविण्यात आले होते. त्यातून, बालेवाडी ते गहुंजे दरम्यानची जागा निवडण्यात आली असून, येत्या काही महिन्यांत त्या जागेवर काम सुरू केले जाण्याची शक्यता आहे.