म. टा. प्रतिनिधी, पुणे
डीजे बंदी असल्याचे जाहीर केल्यानंतरही स्पीकरच्या भिंती लावणाऱ्या मंडळांवर पोलिसांनी कारवाईचा बडगा उगारला. शहरातील विसर्जन मिरवणुकीदरम्यान ध्वनिप्रदूषणाचे १२ गुन्हे दाखल करण्यात आले. त्यापैकी १० मंडळांनी लावलेल्या डीजेचे स्पीकर मिक्सर जप्त करण्यात आले.
विसर्जन मिरवणुकीतील आवाजावर पोलिसांनी मर्यादा आणल्या आहेत; पण त्यांचे पालन होते की नाही, यासाठी महाराष्ट्र प्रदूषण नियंत्रण मंडळ, सीओईपी इंजिनीअरिंग कॉलेजचे विद्यार्थी आणि पोलिस विविध माध्यमांतून मिरवणुकीतील आवाजांकडे लक्ष ठेवले होते. विसर्जन मिरवणुकीच्या मुख्य मार्गातील सगळे चौक आणि परिसरातील रस्त्यांवर चोवीस तास आवाजाची मोजणी करण्यात आली.
गणेशोत्सव विसर्जन मिरवणुकीतील आवाजाची पातळी दर वर्षी वाढत असल्याने पोलिस प्रशासनाने मिरवणुकीत साउंड सिस्टीम आणि स्पीकरच्या भिंतीवर गेल्या दोन वर्षांपासून बंधने आणली आहेत. मिरवणुकीत पारंपरिक वाद्ये किती असावीत, याचेही नियम जाहीर केले आहेत. त्याचबरोबर ४४ मंडळांनी लावलेल्या स्पीकरचे रीडिंग घेऊन तशी नोंद विविध पोलिस ठाण्यांत करण्यात आली असून, पुढील कार्यवाही करण्यात येणार असल्याचे पोलिसांनी कळविले आहे.
---