लशीकरणासाठी ३१ हजार अर्ज

पुणे : करोना प्रतिबंधात्मक लशीकरणाच्या पहिल्या टप्प्यांत शहरातील सुमारे ५० हजार आरोग्य कर्मचाऱ्यांना लस टोचण्यात येणार असून, पैकी ३१ हजार ७२१ आरोग्य कर्मचाऱ्यांचे अर्ज पालिकेकडे प्राप्त झाले आहेत.

करोना प्रतिबंधक लस विकसित होत असतानाच, केंद्रीय आरोग्य मंत्रालयाने लशीच्या वितरणाचे नियोजन सुरू केले आहे. लशीकरणासाठी प्राधान्यक्रम ठरविला असून, त्यामध्ये प्रत्येक राज्यातील आरोग्य कर्मचाऱ्यांचा समावेश आहे. पहिल्या टप्प्यात २५ कोटी जणांना लस टोचली जाणार आहे. त्या पार्श्वभूमीवर प्रत्येक राज्याला सरकारी व खासगी आरोग्य क्षेत्रातील कर्मचाऱ्यांची माहिती पाठविण्याचे निर्देश दिले आहेत. राज्याच्या आरोग्य विभागाच्या सूचनेप्रमाणे महापालिकेने शहरातील सरकारी व खासगी आरोग्य कर्मचाऱ्यांची माहिती संकलनाचे काम सुरू केले आहे.

'लशीकरणाच्या नियोजनासाठी नुकतीच क्षेत्रीय वैद्यकीय अधिकाऱ्यांसोबत बैठक घेतली असून, शहरातील खासगी रुग्णालये आणि जनरल प्रॅक्टिशनरना त्यांची माहिती पाठविण्यासाठी पत्रे दिली आहेत. ही माहिती केंद्राच्या लिंकवर अपलोड करण्यात येणार असून, त्यामध्ये डॉक्टरांचे नाव, पत्ता, संपर्क क्रमांक, आधार क्रमांक, जन्मदिनांक आदी माहितीचा समावेश आहे. डिसेंबरच्या पहिल्या आठवड्यात ही माहिती राज्य सरकारकडे पाठविण्यात येणार आहे,' अशी माहिती पालिकेच्या सहायक आरोग्य अधिकारी डॉ. वैशाली जाधव यांनी दिली.