इंदापूर : पुणे सोलापूर महामार्गावर काळेवाडी गावच्या हद्दीत खासगी बसचा ऊस वाहतूक करणाऱ्या ट्रॅक्टरवर आदळून झालेल्या अपघातात सहा जण जखमी झाल्याची घटना शुक्रवारी पहाटे घडली. बसचालकाच्या प्रसंगावधानामुळे जीवितहानी टळली असल्याचे अपघाताचे स्वरूप पाहता दिसून आले.
पुणे-सोलापूर महामार्गावर काळेवाडी गावच्या हद्दीत सोलापूरहून पुण्याकडे जाणाऱ्या खासगी बस (केए ०१ एबी ५८७८) बसची ऊस वाहतूक करणाऱ्या ट्रॅक्टरच्या दुसऱ्या ट्रेलरवर आदळल्याने हा अपघात घडला. हा अपघात इतका गंभीर होता, कि अपघातग्रस्त बस डिव्हायडरवरून उसाच्या शेतात घुसली. यात बसचालकाने प्रसंगावधान दाखवीत गाडी पलटी होण्यापासून वाचविली. तसेच, इतर वाहनांशी धडक न देता उसाच्या शेतात थांबविण्याचा प्रयत्न केला. या अपघातात सहा प्रवासी जखमी झाल्याची माहिती असून, जखमींची नावे समजू शकली नाहीत.