म. टा. प्रतिनिधी, पुणे
राष्ट्रीय इंडियन मिलिटरी कॉलेज (आरआयएमसी), डेहराडूनमध्ये प्रवेश घेऊ इच्छिणाऱ्या महाराष्ट्रातील विद्यार्थ्यांसाठी एक व दोन डिसेंबर रोजी पुण्यात प्रवेश परीक्षा घेण्यात येणार आहे. ही परीक्षा फक्त मुलांसाठीच आहे. एक जुलै २०१९ रोजी साडेअकरा वर्षांहून अधिक व १३ वर्षांपेक्षा कमी वय असलेले व सातवीत शिकणारे किंवा सातवी उत्तीर्ण मुले या परीक्षेसाठी पात्र आहेत.
यासाठी अनुसूचित जाती-जमातीसाठी ५५५ रुपयांचा डिमांड ड्राफ्ट (जातीच्या दाखल्याच्या मूळ प्रतीसह), व सर्वसाधारण संवर्गातील विद्यार्थ्यांनी ६०० रुपयांचा डिमांड ड्राफ्ट कमांडंट, राष्ट्रीय इंडियन मिलिटरी कॉलेज, डेहराडून, उत्तरांचल, २४८००३ या ठिकाणी पाठवावा. हा ड्राफ्ट स्टेट बँक ऑफ इंडिया या बँकेचाच व 'कमांडंट, आर. आय. एम. सी, डेहराडून' या नावाने काढावा. ड्राफ्टवर पेअेबल अॅट डेहराडून (तेलभवन बँक कोड क्रमांक ०१५७६) अशी नोंद आवश्यक आहे. ड्राफ्टवरील पत्त्यावर पाठवल्यानंतर आरआयएमसीकडून प्रवेश अर्ज व मागील पाच वर्षांचे प्रश्नसंच विद्यार्थ्यांना पाठविण्यात येईल. हा अर्ज भरून योग्य कागदपत्रे जोडून ३० सप्टेंबरपूर्वी आयुक्त, महाराष्ट्र राज्य परीक्षा परिषद, १७, डॉ. आंबेडकर मार्ग, लाल देवळासमोर, पुणे ४११००१ येथे पाठवावा.
या परीक्षेत इंग्रजी, गणित, सामान्यज्ञान या तीन विषयांचे लेखी पेपर असतील. लेखी परीक्षा उत्तीर्ण होणाऱ्या विद्यार्थ्यांच्या मुलाखती चार एप्रिल २०१९ रोजी होतील, अशी माहिती परीक्षा परिषदेचे आयुक्त सुखदेव डेरे यांनी दिली.