'ओएलएक्स'वर आयफोन घेतला आणि फसला!

पुणेः ‘ओएलएक्स’वरून कमी किमतीमध्ये आयफोन खरेदी करणे उच्चशिक्षित तरुणाला महागात पडले आहे. एका अनोखळी व्यक्तीने आयफोन खरेदीसाठी ऑनलाइन तेवीस हजार रुपये घेऊन फसवणूक केल्याचे समोर आले आहे.

सुमीत दुबे (वय २८, रा. अॅमनोरा टाउन टॉवर, हडपसर) यांनी तक्रार दिली आहे. त्यानुसार अज्ञात व्यक्तीविरोधात हडपसर पोलिस ठाण्यात गुन्हा दाखल केला आहे. पोलिसांनी दिलेल्या माहितीनुसार, दुबे नोकरी करतात. त्यांना आयफोनची खरेदी करायची होती. त्यासाठी त्यांनी ‘ओएलएक्स’वर पाहणी केली. त्या वेळी त्यांना स्टॅन्झिन अंगडू नामक व्यक्तीला ‘आयफोन ७’ची २३ हजार रुपयांत विक्री करायची असल्याचे दिसून आले. या मोबाइलची सध्या बाजारातील किंमत ५० हजार रूपये आहे. मात्र, ‘ओएलएक्स’वर तो २३ हजारांत मिळत असल्याचे पाहून दुबे यांनी अंगडूशी संपर्क साधला. अंगडूने दुबेकडून मोबाइलचे २३ हजार रूपये पेटीएमव्दारे घेतले. तसेच, त्यांना मोबाइल पाठवून न देता फसवणूक केल्याचे तक्रारीत नमूद करण्यात आले आहे. हा प्रकार २८ ऑगस्ट ते १ सप्टेंबर दरम्यान घडला. अंगडूशी वारंवार संपर्क साधूनही त्याने कोणताही प्रतिसाद दिला नाही.