आई रागावल्याने मुलीची गळफास घेत आत्महत्या

मटा ऑनलाइन वृत्त। पुणे

आई रागावते या कारणावरून एका १४ वर्षीय मुलीने आपल्या राहत्या घरात गळफास घेऊन आत्महत्या केली. पुण्यातील हडपसर येथील माळवाडी परिसरात आज दुपारी (रविवार) ही धक्कादायक घटना घडली. निकिता युवराज शिर्के असे या मुलीचे नाव आहे.

पोलिसांनी दिलेल्या माहितीनुसार, निकिता ही इयत्ता आठवीत शिकत होती. आज दुपारी तिचा मृतदेह तिच्या कुटुंबीयांना राहत्या घरात गळफास घेतलेल्या अवस्थेत आढळून आला. त्यांनी याबाबत हडपसर पोलिसांना माहिती दिली. त्यानंतर तिचा मृतदेह ताब्यात घेऊन पोलिसांनी शवविच्छेदनासाठी पाठवून दिला.

निकिताच्या शाळेला पंधरा दिवसांपासून सुट्टी आहे. सुट्टीच्या कालावधीत ती सतत घरातून बाहेर जात असल्याच्या कारणाने आई-वडिल तिच्यावर रागावले. आई-वडिलांचे रागावणे सहन न झाल्याने तिने आत्महत्या केली असल्याचे प्राथमिक चौकशीत समोर आले आहे.