डेक्कन परिसरातील चॅम्पियन स्पोर्ट्‌स दुकानाला आग; क्रीडा साहित्य जळून खाक

पुणे : गोपाळ कृष्ण गोखले (फर्ग्युसन) रस्त्यावरील चॅम्पियन स्पोर्ट्‌स या क्रीडा साहित्याच्या दालनाला सोमवारी सकाळी आग लागली. आगीत क्रीडा साहित्य जळाले. तासाभरानंतर आगीवर नियंत्रण मिळवता आले. आगीमागचे कारण समजू शकलेले नाही.

डेक्कन जिमखाना परिसरात गोखले स्मारक चौकाजवळ चॅम्पियन स्पोर्ट्स तीन मजली दालन आहे. सोमवारी सकाळी पाउणे नऊच्या सुमारास दालनातून मोठ्या प्रमाणावर धूर येत असल्याचे नागरिकांच्या लक्षात आले. त्यांनी या घटनेची माहिती तातडीने अग्निशमन दल तसेच डेक्कन पोलिसांना दिली. अग्निशमन दलाचे पाच बंब घटनास्थळी दाखल झाले.

एरंडवणे अग्निशमन केंद्राचे प्रमुख राजेश जगताप आणि जवानांनी पाण्याचा मार करून आग आटोक्यात आणली. आगीत क्रीडा साहित्य जळाले. पहाटे दालनात आग लागली असावी. आग धुमसत राहिल्यानंतर भडकली. दालनातील रबरी क्रीडा साहित्य, कपडे; तसेच अन्य वस्तूंनी पेट घेतला. आगीमागचे कारण समजू शकले नाही, अशी माहिती डेक्कन पोलिसांनी दिली.