बारावीच्या विद्यार्थ्याचा बुडून मृत्यू

जुन्नर : शिवनेरी किल्ल्यावर जाण्यापूर्वी वडज धरणाजवळ हात-पाय धुण्यासाठी उतरलेल्या कमलेश मांगीवाल या विद्यार्थ्याचा बुडून मृत्यू झाला आहे. विशेष म्हणजे शिवज्योत प्रतिष्ठानच्या शंभर कार्यकर्त्यांसोबत असूनही कमलेश बेपत्ता झाल्याचे कुणालाही कळले नाही. तीन दिवसांनंतर त्याचा मृतदेह वडज धरणाच्या काठावर तरंगत असल्याचे आढळले.

मानखुर्द (मुंबई)येथील शिवज्योत प्रतिष्ठानचे सुमारे शंभर कार्यकर्ते शिवनेरी गडाकडे शिवज्योत घेण्यासाठी निघाले. त्यातील अनेकजण ज्योत घेऊन गेले. पण, त्यांच्यासोबत आलेला कमलेश हा परत गेलाच नाही. ही बाब कुणाच्याही लक्षात आली नाही. मुलगा बेपत्ता झाल्याची तक्रार कमलेशच्या वडिलांनी मानखुर्द पोलिस ठाण्यात दिली होती. मात्र,किल्ले शिवनेरीवर जाण्यापूर्वी सर्व कार्यकर्ते वडज धरणाजवळ हातपाय धुण्यासाठी गेले होते. या पाण्यात कमलेश बुडाला, याचा पत्ताही कोणाला लागला नाही. तीन दिवसांनंतर वडज धरणाच्या काठावरील स्मशानभूमीजवळ एक मृतदेह तरंगत असल्याचे कुसुरचे पोलिस पाटील सत्यवान ताजणे यांना दिसले. त्यांनी जुन्नर पोलिसांना ही माहिती कळवली. त्या वेळी तपास केला असता तो मृतदेह कमलेशचा असल्याचे स्पष्ट झाल्यावर जुन्नर पोलिसांनी ही माहिती मानखुर्द पोलिसांना कळवली. माहिती कळताच कमलेशचे वडील, मानखुर्द येथील शिवज्योत प्रतिष्ठानचे कार्यकर्ते आणि शिवसेनेचे काही पदाधिकारीही जुन्नरला आले.