पंप नादुरुस्तीमुळे तलाव अधिकाधिक वेळ बंद ; नागरिकांचा हिरमोड
म. टा. प्रतिनिधी, पिंपरी
शहरातील अण्णासाहेब मगर स्टेडियमवरील जलतरण तलाव ऐन उन्हाळ्यात दिवसातून एकदाच सुरू ठेवला जात असल्याने पोहण्यासाठी येणाऱ्या नागरिकांचा हिरमोड होतो आहे. विद्युत विभाग आणि क्रिडा विभाग यांच्यातील समन्वयाच्या अभावामुळे तलावाचे पाणी स्वच्छ करण्यासाठी वापरात येणारी मोटार नादुरुस्त अवस्थेत आहे. यामुळे तलाव दिवसातून अधिकाधिक वेळ बंद राहत असल्याने नागरिक संताप व्यक्त करीत आहेत.
शाळांना सुट्टी लागल्यावर एप्रिल-मे महिन्यात नागरिक येथे मोठ्या संख्येने पोहायला गर्दी करतात. काहीजण अतिरिक्त फी भरून प्रशिक्षकाकडून पोहणे शिकण्यासाठी येतात. पोहण्याचा तलाव एकदा वापरला की तेथील पाणी स्वच्छ करावे लागते. त्यासाठी मोटारीचा वापर करावा लागतो; पण जास्त दाब येत असल्याने ही मोटार दिवसातून एकदाच वापरता येते. त्यानंतर मोटार बंद ठेवून काही वेळाने पुन्हा वापरावी लागते. यामुळे तलाव बंद असल्याचे नागरिकांना सांगितले जाते.
पंप चालण्यासाठी ही मोटार वेळेत दुरूस्त केली नसल्याने दिवसातून एकदाच म्हणजे केवळ सकाळीच तलाव सुरु असतो. दुपारी पालक मुलांना घेऊन येतात. या वेळी मात्र तलाव बंद ठेवला जात असल्याने पालक आणि मुलांना माघारी फिरावे लागते. पालकांना, 'पंपाचे काम सुरु आहे,' अशीच उत्तरे नेहमी मिळतात. तलावाची दुरुस्ती लवकरात लवकर करण्याची मागणी नागरिक करत आहेत.
या संदर्भात क्रीडा समिती सभापतींकडे विचारणा केली असता, 'जलतरण तलावाची समस्या लवकर सोडवू,' असे त्यांनी सांगितले. मगर स्टेडियमवरील तलावाबाबत कोणतीही तक्रार आमच्याकडे आलेली नाही. तलावासंदर्भात काही समस्या असतील, तर त्या आम्ही नक्कीच सोडवू, असे सभापती लक्ष्मण सस्ते यांनी सांगितले.
---
जलतरण तलाव दिवसातून एकदाच सुरू असतो. संबंधितांकडे चौकशी केली असता तलावातील पंप नादुरुस्त असल्याचे कारण सांगितले जाते. त्यामुळे पोहण्यास येणाऱ्या मुलांचे नुकसान होते आहे.
- वीणा सोनवलकर (भारतीय जनता युवा मोर्चा, माजी प्रदेश सचिव)
-------
अण्णासाहेब मगर जलतरण तलावाची क्षमता १५० व्यक्तींची आहे. उन्हाळी सुट्यांमुळे येथे मोठ्या संख्येने नागरिक पोहायला येतात. त्यामुळे तलावातील पाण्याची गुणवत्ता राखण्यासाठी ते वारंवार स्वच्छ करावे लागते. याच कारणाने तलाव अनेकदा बंद असतो. मात्र, सध्या हा तलाव दिवसभर सुरु ठेवण्याचा आमचा प्रयत्न आहे.
- मनोज लोणकर (सहायक आयुक्त, क्रीडा विभाग)
---------