पुणे : छत्रपती शिवाजी महाराज यांच्या जन्मस्थळी जुन्नर तालुक्यातील शिवनेरी किल्ल्यावर महापालिका शाळांतील विद्यार्थ्यांसाठी सहलीचे आयोजन करण्यात येणार आहे. त्यासाठी अर्थसंकल्पात एक कोटी रुपयांची तरतूद करण्यात आली असून, पालिका शाळांतील एक लाख विद्यार्थ्यांना शिवनेरी किल्ल्याची माहिती व्हावी, यासाठी हा निर्णय घेण्यात आला आहे.
छत्रपती शिवाजी महाराजांचे चरित्र सर्वांसाठी प्रेरणादायी असून त्यांच्यातील गुणांचे विद्यार्थ्यांमध्ये संवर्धन व्हावे या उद्देशाने दर वर्षी पुणे महापालिकेतील विद्यार्थ्यांसाठी शिवनेरीवर सहलीचे आयोजन करण्यात येणार असल्याचे अर्थसंकल्पात नमूद करण्यात आले आहे. दरम्यान, 'विद्येच्या माहेरघरा'त शिक्षणासाठी येणाऱ्या विद्यार्थ्यांची संख्या मोठी आहे. त्यांना शहरातील निवास आणि भोजनासारखे खर्च परवडत नाहीत. त्यांची गैरसोय होत असल्याने अनेकांना शिक्षण अर्धवट सोडावे लागते. त्यामुळे शहरातील शाळा आणि महाविद्यालयांच्या अवतीभवती महापालिकेच्यावतीने वसतिगृहांची निर्मिती करण्यात येणार असल्याचेही अर्थसंकल्पात नमूद करण्यात आले आहे.
.........
विद्यार्थ्यांसाठी योजना
- खगोलशास्त्रासाठी विशेष तरतूद.
- छत्रपती शिवाजी महाराज औद्योगिक प्रशिक्षण संस्थेचा कायापालट.
- शुक्रवार पेठ आणि सदाशिव पेठेत क्रीडा संकुल.
- महापालिकेच्यावतीने यंदापासून क्रीडा 'महोत्सवा'चे आयोजन करणार.
..........