नवजात बालकांचेही येणार आधार कार्ड

सरकारी व खासगी हॉस्पिटलना सरकारचे आदेश

म. टा. प्रतिनिधी, पुणे

शासकीय आणि खासगी हॉस्पिटलमध्ये जन्मलेल्या नवजात बालकांची आधार प्रणालीत नोंद करण्याचे आदेश राज्य सरकारने दिले आहेत. नवजात बालकाचे नाव निश्चित केले नसले, तरी ‘बेबी’ या नावाने त्याची आधार नोंदणी करण्यात यावी, अशी स्पष्ट सूचना देण्यात आली आहे. त्यामुळे यापुढील काळात नवजात बालकांची हॉस्पिटलमध्येच आधार नोंदणी होणार आहे.

केंद्र सरकारने देशातील प्रत्येक नागरिकाला आधार क्रमांक देण्याचा निर्णय घेतला आहे. देशभरातील जवळपास ऐंशी टक्के नागरिकांना आधार कार्ड देण्यात आले आहे. उर्वरित आधार कार्ड देण्यासाठी सरकार प्रयत्नशील आहे. महाराष्ट्रातही ऐंशी ते पंचाऐंशी टक्के नागरिकांना आधार कार्डचे वाटप करण्यात आले आहे.

सध्यस्थितीत पाच वर्षाखालील बालकांच्या आधार नोंदणीमध्ये बोटांचे ठसे आणि डोळ्यातील बाहुलीची प्रतिमा ही बायोमेट्रिक माहिती याची नोंद घेता येत नाही. त्यामुळे त्यांचे आधार क्रमांक हे पालकांच्या आधार क्रमांकाशी लिंक केले जातात. त्याच धर्तीवर नवीन आधार लिंक कार्यान्वित करण्याचा प्रस्ताव सरकारच्या विचाराधीन होता.

नवजात बालकाचे नाव लगचेच निश्चित केले जात नाही. त्यामुळे मुलाच्या नावाचा उल्लेख न करता त्याची बेबी म्हणून आधार नोंदणी करावी. ही नोंदणी करताना आईचे नाव व तिचे कितवे अपत्य याची माहिती घेऊन नोंदणी करण्यात यावी, असे स्पष्ट करण्यात आले आहे. आधार नोंदणी झालेल्या बालकाचे नाव निश्चित झाल्यावर तो आधारमध्ये नोंदविण्यासाठी http://uidai.gov.in या संकेतस्थळावर सोय उपलब्ध करून देण्यात आली आहे.