म. टा. प्रतिनिधी, पुणे
आचारसंहिता, निवडणुकांची कारणे देत पुणे जिल्ह्यातील ठप्प झालेली आधार केंद्रे आता कार्यान्वित करण्यात आली आहेत. त्यामुळे नागरिकांना दिलासा मिळाला आहे. मात्र, निवडणूक प्रक्रिया पूर्ण झाल्यानंतर शहरासह जिल्ह्यात पुरेशी आधार केंद्रे सुरू असल्याचे जिल्हा प्रशासनाने जाहीर केले.
सध्या पुणे, पिंपरी-चिंचवड आणि ग्रामीण भागातील सरकारी कार्यालयांत मिळून १५०, बँकांमध्ये १०० आणि टपाल कार्यालयांमध्ये १३६ अशी शहरासह जिल्ह्यात ३९६ आधार केंद्रे सुरू करण्यात आली आहेत, असेही जिल्हा प्रशासनाने स्पष्ट केले. पुणे आणि पिंपरी-चिंचवडमध्ये मिळून शहरी भागात २८० आणि ग्रामीण भागात ११६ अशी ३९६ आधार केंद्रे आहेत.
खासगी जागेसह 'आपले सरकार' सेवा केंद्रे येथे सुरू असलेली सर्व आधार केंद्रे सरकारी जागेत स्थलांतरित केली आहेत. पुणे, पिंपरी-चिंचवड महापालिकांची क्षेत्रीय कार्यालये, कँटोन्मेंट बोर्ड, पुणे महापालिकेचे कर संकलन केंद्र, जिल्ह्यातील तहसील कार्यालये, नगरपालिका, पंचायत समिती अशा विविध सरकारी कार्यालयांमध्ये आधार केंद्रे सुरू करण्यात आली आहेत.
यंदाच्या वर्षी जूनच्या दुसऱ्या आठवड्यात अनेक आधार केंद्रे बंद होती. महाविद्यालयीन प्रवेश सुरू असल्याने अनेक विद्यार्थ्यांसह पालकांचे मोठे नुकसान झाले. दुसऱ्या आठवड्यात अनेक आधार केंद्रे बंद होती. प्रत्येक सरकारी कामे, रुग्णालये, विमान प्रवास अशा विविध कारणांसाठी आधार क्रमांक बंधनकारक करण्यात आला आहे. त्यामुळे आधार नोंदणीपेक्षा आधार कार्डवरील वय, पत्ता, मोबाइल क्रमांक, जन्मतारीख, छायाचित्र अशा विविध दुरुस्त्यांसाठी नागरिकांची आधार केंद्रांवर गर्दी होत असते. मात्र, निवडणुका, आचारसंहितेच्या काळात आधार केंद्रे ठप्प झाली होती. त्यावेळी निवडणूक प्रक्रिया पूर्ण झाल्यावर आधार केंद्रे पूर्ववत होतील, असे जिल्हाधिकारी नवल किशोर राम यांनी स्पष्ट केले होते.
सुरू असलेली आधार केंद्रे
आधार केंद्रे ............. पुणे......... पिंपरी-चिंचवड.......... ग्रामीण
सरकारी कार्यालये........७३ ............... २६ ................... ४७
बँक ....................... ६७ ..................२३ .................... २५
टपाल कार्यालये ..........६६................... २५............ ४४
एकूण ......................२०६ .................७४ ................... ११६
'बीएसएनएल'मध्ये केंद्र
युनिक आयडेंटिफिकेशन अॅथॉरिटी ऑफ इंडियाने (यूआयडीएआय) भारतीय संचार निगम लिमिटेडलाही (बीएसएनएल) त्यांच्या कार्यालयात आधार केंद्रे सुरू करण्याचे निर्देश दिले आहेत. त्यानुसार चालू महिन्यापासून शहरातील मॉडेल कॉलनी, धनकवडी आणि चिंचवड येथील डीजीएम ऑफिस येथे प्रत्येकी एक अशी तीन केंद्रे सुरू झाली आहेत.