गरोदर असल्याचा खोटेपणा लपविण्यासाठी अपहरण

अटक महिलेकडून धक्कादायक माहिती

म. टा. प्रतिनिधी, पुणे

पुणे स्टेशन परिसरातून आठ महिन्यांच्या चिमुरडीच्या अपहरणप्रकरणी अटक करण्यात आलेल्या महिलेकडून धक्कादायक माहिती समोर आली आहे. दुसऱ्या पतीसोबत राहताना गरोदर असल्याचे खोटे सांगितेलेले लपविण्यासाठी या चिमुरडीचे अपहरण केल्याचे समोर आले आहे.

तिचा पती भोळसर असल्याचा फायदा घेऊन हे अपहरण नाट्य केल्याचे पोलिसांकडून सांगण्यात आले. रंजना जगन्नाथ पांचाळ उर्फ अनुष्का रविंद्र रणपिसे (वय ४२) असे अटक केलेल्या महिलेचे नाव आहे. रंजना पांचाळचे पहिले लग्न झालेले आहे. तिला दोन मुले आहेत. ती पहिल्या पतीपासून विभक्त झाली आहे. त्यानंतर ती चिंचवड येथील एका व्यक्तीसोबत राहू लागली. तिने दोन मुलांनंतर कुटुंब नियोजन शस्त्रक्रिया केली होती. मात्र, सध्या राहत असलेल्या व्यक्तीला तिने केलेल्या कुटुंब नियोजन शस्त्रक्रियेबाबत माहिती नव्हती. तिचा पती भोळसर आहे. त्याचा फायदा घेऊन तिने आपण गरोदर असल्याचे काही महिन्यांपूर्वी त्याला सांगितले. त्याच्याकडून रुग्णालयात जायचे, असल्याचे सांगून ती पैसेही घेत असे. घटनेच्या दोन दिवस आधी तिने पतीकडून २० हजार रुपये घेतले. त्यानंतर ती दोन दिवस पुणे स्टेशन परिसरात थांबली. तिने या मुलीच्या आईवडिलांचा विश्वास संपादन केला. मुलीसाठी कपडे घेतले. तसेच, त्यांना जेवणासाठी पैसे दिले आणि त्यांना हॉटेलमध्ये पाठवले. त्यानंतर तिला घेऊन पसार झाली. रेल्वे पोलिसांनी आणि गुन्हे शाखेने तिला सोमवारी रात्री वाल्हेकरवाडी येथून अटक केली. दोन दिवस वारजे येथील नातेवाइकांकडे गेली. त्यांना ही चिमुरडी दत्तक घेतल्याचे सांगितले. तेथून ती पतीकडे गेली. पोलिस निरीक्षक अनिल दबडे, त्यांचे पथक व गुन्हे शाखेच्या सामाजिक सुरक्षा विभागाचे सतिश ढोले यांनी ही कारवाई केली.

रेल्वे स्टेशन परिसरात अशा घटना घडू नये यासाठी गस्त वाढवली जाईल. रेल्वे प्रवासात, रेल्वे स्टेशनवर कोणतीही अडचण आली, तर प्रवाशांनी त्वरीत १५१२ क्रमांकावर संपर्क साधावा. त्यावरून त्यांना काही वेळेत मदत मिळेल.

- डॉ. प्रभाकर बुधवंत, अधीक्षक, रेल्वे पोलिस

आई-वडिलांची दखल घेतली नाही

मुलगी व ती महिला जागेवर दिसत नसल्याने आई वडिलांनी शोध घेतला. स्टेशन परिसरातील रेल्वे पोलिस ठाण्यात ते गेले मात्र त्यांना तिथे मदत मिळाली नाही. त्यानंतर ते बंडगार्डन पोलिस ठाण्यात गेले. बंडगार्डन पोलिसांचे मार्शल घटनास्थळी गेले. त्यानंतर ही हद्द रेल्वे पोलिसांची असल्याचे कळाले. ते परत रेल्वे पोलिसांकडे गेले व त्यांनी माहिती दिली. पोलिसांना गांभीर्य कळले. तोपर्यंत बराच वेळ गेला होता. रेल्वे पोलिसांनी शोध घेण्याचा प्रयत्न केला. दोन दिवसांमध्ये त्यांना काहीच हाती लागले नाही. रेल्वे पोलिसांच्या स्थानिक गुन्हे शाखेकडे तपास हा तपास देण्यात आला. पुणे पोलिसांच्या पुणे शाखेनेही या प्रकरणात लक्ष घातले. आठ दिवसांत या मुलीला शोधण्यात आले.