म. टा. प्रतिनिधी, पुणे
संगीत क्षेत्रात थोर व्यासंगी आणि चतुरस्र अशी ओळख असणाऱ्या पं. जितेंद्र अभिषेकी यांच्या स्मरणार्थ १४व्या संगीत महोत्सवाचे २६ ते २८ ऑक्टोबर दरम्यान आयोजन करण्यात आले आहे. हा महोत्सव यशवंतराव चव्हाण नाट्यगृहात होणार आहे. महोत्सवाचे उद्घाटन पालकमंत्री गिरीश बापट, महापौर मुक्ता टिळक यांच्या हस्ते होणार आहे, अशी माहिती पं. शौनक अभिषेकी यांनी पत्रकार परिषदेत दिली. या वेळी पं. हेमंत पेंडसे, उज्ज्वल केसकर, महेश पानसे उपस्थित होते. महोत्सवादरम्यान 'पं. जितेंद्र अभिषेकी स्मृती पुरस्कार' हा यंदाच्या वर्षी दूरदर्शवर शास्त्रीय संगीतावर आधारीत अनेक कार्यक्रमांची निर्मिती करणारे अरुण काकतकर यांना प्रदान करण्यात येणार आहे. तरुण कलावंतांना देण्यात येणारा 'युवा पुरस्कार' डॉ. रेवती कामत यांना दिला जाणार आहे. मुख्य पुरस्कारासाठी रोख रक्कम १० हजार रुपये, तर युवा पुरस्कारासाठी पाच हजार रुपये रोख, सन्मानचिन्ह असे पुरस्काराचे स्वरूप आहे.
कार्यक्रमाच्या उद्घाटनानंतर 'सुगम संगीत रजनी' हा भाव-भक्तिगीतांच्या कार्यक्रम होईल. यात गायिका प्रियांका बर्वे, सावनी रवींद्र हृषीकेश रानडे, अनिरुद्ध जोशी यांचा सहभाग आहे, तर युवान्मेष कार्यक्रमात अद्वैत केसकर, गंधार देशपांडे, शाश्वती मंडल, पार्था बोस, पं. विजय घाटे, श्रीधर पार्थोसारथी, शीतल कोलवलकर, मिलिंद कुलकर्णी, नागेश आडगावकर सादरीकरण करणार आहेत; तसेच रागिणी देवळे आणि सत्येंद्रसिंह सोळंकी यांना युवा पुरस्कार देण्यात येणार असल्याची माहितीही या वेळी देण्यात आली.