म. टा. प्रतिनिधी, पुणे
खुनाचा प्रयत्न केल्याच्या गुन्ह्यात फरारी असलेल्या आरोपीला एका वर्षानंतर गुन्हे शाखा युनिट चारने विश्रांतवाडी परिसरात पकडले. त्याला पुढील कारवाईसाठी फलटण ग्रामीण पोलिसांकडे दिले आहे.
शेखर बाळू चव्हाण (वय २४, रा. वारेवस्ती, खामगाव, ता. फलटण) असे अटक केलेल्याचे नाव आहे. फलटण परिसरात एका वर्षापूर्वी एका तरुणाचे अपहरण करून त्याला मारहाण करण्यात आली होती. या प्रकरणी फलटण ग्रामीण पोलिस ठाण्यात गुन्हा दाखल होता. या प्रकरणात काही आरोपींना अटक केली होती. पण, शेखर चव्हाण हा वर्षापासून पसार होता. गुन्हे शाखा युनिट चारच्या पोलिसांना चव्हाण विश्रांतवाडी परिसरात असल्याची माहिती मिळाली. त्यानुसार पोलिस उपनिरीक्षक विजय झंजाड यांच्या पथकाने त्याला अटक केली. त्याच्याकडे चौकशी केल्यानंतर त्याने गुन्ह्याची कबुली दिली आहे. चव्हाण याच्यावर फलटण पोलिस ठाण्यात तीन गुन्हे दाखल असल्याचे समोर आले आहे.