पुणे-सोलापूर महामार्गावर भीषण अपघात; दुचाकीस्वार थोडक्यात बचावला

पुणे : पुणे- सोलापूर महामार्गावर सोमवारी सकाळी भीषण अपघात झाला आहे. वेगात आलेल्या कार चालकाने दुचाकीस्वाराला दिलेल्या धडकेनंतर दुचाकीस्वार उडून दोन वाहनांना धडकला. यात तो गंभीर जखमी झाला आहे. लोणी काळभोर येथील लोणी कॉर्नर परिसरात ही घटना घडली. या अपघातात दुचाकीस्वार थोडक्यात बचावला. सूर्यकांत उर्फ तानाजी शनैश्वर चव्हाण (वय-६२) असं अपघातात जखमी झालेल्या व्यक्तीचं नाव आहे.

याबाबत अधिक माहिती अशी की, सकाळी लोणी कॉर्नर येथून दुचाकी चालक सूर्यकांत उर्फ तानाजी चव्हाण हे दुग्ध व्यावसायिक असल्याने ते लोणी काळभोर परिसरात दूध विक्रीचे काम करतात. सूर्यकांत चव्हाण हे नेहमीप्रमाणे सकाळी पावणेसात वाजण्याच्या सुमारास लोणी गावात दूध विक्रीसाठी दुचाकीवरून चालले होते. पुढे ते लोणी कॉर्नरकडून लोणी गावाच्या दिशेने जात असताना उरुळी कांचनच्या दिशेने जाणाऱ्या एका पांढऱ्या रंगाच्या चारचाकी वाहनाने त्यांना जोरदार धडक दिली. कारने धडक दिल्याने चव्हाण यांनी दुचाकीसह पुणे-सोलापूर महामार्गावर ५ ते ६ पलट्या मारल्या. नंतर कंटेनरला धडकून ते खाली पडले. मात्र सुदैवाने त्यांचे प्राण वाचले आहेत. घटनास्थळवरून कार चालक फरार झाला.

सत्ताधाऱ्यांना भिडणाऱ्या, मुश्रीफ-बंटींना नडणाऱ्या, गोकुळमधील विरोधकांचा 'आवाज' बनलेल्या शौमिका महाडिक!

दरम्यान, घटनेची माहिती मिळताच लोणी काळभोर पोलीस घटनास्थळी दाखल झाले आणि त्यांनी परिस्थितीचा आढावा घेतला. जखमीला उपचारासाठी रुग्णालयात दाखल करण्यात आलं आहे. सीसीटीव्ही फुटेजवरून पोलीस कारचालकाचा तपास करत आहेत.