म. टा. वृत्तसेवा, इंदापूर
पोलिस कर्मचाऱ्यांच्या मिनी बसचा टायर फुटल्याने झालेल्या अपघातात दोन पोलिस कर्मचारी गंभीर जखमी झाल्याची घटना पुणे-सोलापूर महामार्गावर बिजवडी (ता. इंदापूर) गावच्या हद्दीत सोमवारी सकाळी साडेआठच्या सुमारास घडली. बसमधील पोलिस कर्मचारी सोलापूर राज्य राखीव पोलिस बल गट क्रमांक दहामधील आहेत.
महामार्ग पोलिस केंद्राचे सहायक फौजदार बी. जे. जाधव यांनी दिलेल्या माहितीनुसार, सोलापूर राज्य राखीव पोलिस बल गट क्रमांक दहामधील पोलिस अधिकारी व कर्मचारी दौंड येथे फायरिंगसाठी निघाले होते. त्या वेळी पुणे-सोलापूर महामार्गावरील बिजवडी (ता. इंदापूर) गावच्या हद्दीत त्यांच्या मिनी बसचा (एमएच १३ पी ०४३७) डाव्या बाजूचा पाठीमागील टायर फुटला. त्यामुळे बस उलटली. यामध्ये बसमधील चालक पोलिस नाईक यू. आर. सातव, पोलिस शिपाई एस. डी. चव्हाण जखमी झाले.
सहायक फौजदार एस. बी. बगाड, पोलिस कर्मचारी एस. आर. काळे, एस. ए. पवार, एस. व्ही. तीर्थकर, व्ही. एस. साबरे, जी. एच. जाधव, एस. एम. बनसोडे यांना किरकोळ मार लागला. एस. डी. चव्हाण गंभीर जखमी झाले. जखमींना उपचारांसाठी इंदापुरातील खासगी रुग्णालयात दाखल करण्यात आले.
अपघाताची माहिती समजताच महामार्ग पोलिस केंद्राचे सहायक फौजदार बी. जे. जाधव, पोलिस हवालदार डी. के. मदने, भीमराव आहेर, एन. डी. वाघ यांनी घटनास्थळी धाव घेतली.