नांदेड : मुखेड तालुक्यातील खतगाव येथील रहिवासी असलेला भारतीय सैन्य दलातील जवान संभाजी शिवाजी पानगटवार हे सुटीवर गावी आले होते. आनंदवाडी (ता. देवणी जि. लातूर) येथे सासरवाडीला जात असताना वाहनाला झालेल्या अपघातात त्यांचा मृत्यू झाला. ही घटना १४ फेब्रुवारीला घडली.
नऊ महिन्यांपूर्वी म्हणजे २८ एप्रिल २०१९ रोजी त्याचा विवाह झाला होता. कोलकत्ता येथे भारतीय सैन्य दलात गनर म्हणून कर्तव्यावर होते. दोन दिवसांपूर्वी सुटीवर आलेले संभाजी पानगटवार सासरवाडीला जाण्यासाठी निघाले होते. त्यांच्या मोटरसायकलला पाठीमागून येणाऱ्या क्रुझरने जोरदार धडक दिली. त्यात त्यांचा जागीच मृत्यू झाला. शनिवारी दुपारी त्यांच्या पार्थिवावर शोकाकुल वातावरणात शासकीय इतामामात अंत्यसंस्कार करण्यात आले. त्यांच्या पश्चात पत्नी, आई-वडील, भाऊ असा परिवार आहे.