म. टा. प्रतिनिधी, पुणे
बनावट नोटा चलनात आणणाऱ्या एका आरोपीला खंडणीविरोधी पथकाने केरळ येथून ताब्यात घेतले. त्याला कोर्टाने सात दिवस पोलिस कोठडीत ठेवण्याचा आदेश दिला.
निधीश उर्फ पंडित विनायक कळमकर ऊर्फ अक्षय विलास शर्मा (वय ३६, रा. उंड्री, कोंढवा) असे अटक केलेल्या व्यक्तीचे नाव आहे. यापूर्वी पोलिसांनी त्याच्या इतर दोन साथीदारांना अटक केली आहे. या पूर्वीदेखील त्याच्यावर हैदराबाद, पुणे ग्रामीण परिसरात गुन्हे दाखल आहेत. कळमकर याच्यासह त्याच्या इतर दोन साथीदारांवर गेल्या वर्षी बनावट नोटांप्रकरणी समर्थ पोलिस ठाण्यात गुन्हा दाखल आहे.
निधीश याच्या साथीदारांकडे २०० रुपयांच्या ९२ बनावट नोटा मिळाल्या होत्या. या गुन्ह्यात त्याचा सहभाग असल्याचे समोर आले होते. गुन्हा दाखल झाल्यापासून तो फरारी होता. अशाच प्रकारचा गुन्ह्यात त्याला केरळ पोलिसांनी अटक केली होती. त्याची माहिती वरिष्ठ निरीक्षक राजेंद्र मोहिते, उपनिरीक्षक संजय गायकवाड यांना समजली. त्यानुसार गुन्हे शाखेच्या पथकाने केरळ येथे जाऊन त्याला ताब्यात घेतले. आरोपीकडून जप्त करण्यात आलेल्या व त्यांनी बाजारात चलनात आणलेल्या बनावट नोटा कोठे छापल्या आहेत, यामध्ये त्याचे आणखी कोणी साथीदार आहेत का, या सर्व बाबींचा तपास पोलिस करीत आहेत.