म. टा. प्रतिनिधी, पुणे
सरकारी नियमापेक्षा तिकिटाचे जादा दर आकारणाऱ्या ४५ खासगी ट्रॅव्हल्सवर संगमवाडी येथे वाहतूक पोलिस व परिवहन विभागाने एकत्रितपणे कारवाई केली. यापुढेदेखील ही कारवाई सुरू राहणार असल्याचे वाहतूक पोलिसांनी स्पष्ट केले.
दिवाळीनिमित्त पुण्यातून गावी जाणाऱ्या प्रवाशांची संख्या मोठी असते. त्यामुळे या काळात अनेक प्रवासी खासगी बसचा पर्याय निवडतात. त्याचा फायदा घेऊन खासगी बसचालकांकडून प्रचंड मोठ्या प्रमाणात भाडेवाढ करून प्रवाशांची लूट केली जाते. या पार्श्वभूमीवर वाहतूक पोलिस व परिवहन विभागाने ही कारवाई केली. काही दिवसांपूर्वीच ट्रॅव्हल्सचालकांना सूचना देण्यासाठी वाहतूक पोलिस उपायुक्त पंकज देशमुख यांच्या मार्गदर्शनाखाली बैठक पार पडली.
या वेळी 'आरटीओ' प्रशासनातील अधिकाऱ्यांसह ट्रॅव्हल्स कंपनीचे मालक, चालक, बुकिंग एजंट उपस्थित होते. सरकारी निर्णयानुसार एसटी आकारत असलेल्या तिकीट दरापेक्षा दीडपड जादा भाडे आकारण्याची सवलत खासगी वाहन चालकांना दिली जाते. यापेक्षा जादा भाडे आकारल्यास संबंधितांवर कडक कारवाई करण्यात येणार असल्याचे वाहतूक पोलिसांनी सांगितले होते. शहरात येणाऱ्या व जाणाऱ्या ट्रॅव्हल्सची तपासणी करण्यास वाहतूक पोलिस व परिवहन विभागाने सुरुवात केली. त्या वेळी संगमवाडी येथे २३ ऑक्टोबरला ४५ खासगी ट्रॅव्हल्सवर जादा प्रवाशी भाडे आकारल्याने कारवाई केली आहे. त्यांच्यावर फौजदारी गुन्हे दाखल केले जाणार आहेत. तसेच, ही कारवाई पुढील काही दिवस राहणार असल्याचे वाहूतक पोलिसांकडून स्पष्ट करण्यात आले.
-------------
प्रवाशांनो, येथे करा तक्रार!
जादा तिकीट आकारणे, पैसे घेऊन सुविधा न देणे यासह विविध तक्रारींसाठी वाहतूक पोलिसांकडून 'हेल्पलाइन नंबर' देण्यात आला आहे. प्रवाशांनी कुठलीही तक्रार असल्यास ८४११८००१०० यावर 'व्हॉट्स अॅप'द्वारे करावी. तसेच, ०२०-२६६८५०० या वाहतूक नियंत्रक कक्षाच्या क्रमांकावरही तक्रार करता येणार आहे.