परभणी: बारावी परीक्षेत कॉपी करणाऱ्या तब्बल ६८ कॉपी बहाद्दरांवर जिल्हा शिक्षण विभागाच्या भरारी पथकाने सोमवारी (२४ फेब्रुवारी ) कारवाई केली.
पूर्णा येथील तहसील कार्यालया शेजारी असलेल्या संस्कृती महाविद्यालयातील बारावीच्या परीक्षा केंद्रावर कॉपी करतांना आढळलेल्या तब्बल ३८ कॉपी बहाद्दरांवर सोमवारी शिक्षणाधिकाऱ्याच्या पथकाने कारवाई केली. या केंद्रावर पूर्णा शहरासह तालुक्यातील इंदिरा गांधी महाविद्यालय, श्री गुरुबुद्धी स्वामी महाविद्यालय, झिरो फाटा येथील हायटेक महाविद्यालय, स्वातंत्र्य सैनिक सूर्यभान पवार महाविद्यालय, संस्कृती महाविद्यालय, संत गाडगेबाबा महाविद्यालय लक्ष्मीनगर, शब्दसह्याद्री महाविद्यालय नावकी येथील ५०९ विद्यार्थ्यांपैकी ४८४ विद्यार्थी परीक्षा देत आहेत. सोमवारी भौतिकशास्त्र, सचिवांची कार्यपद्धती, किमान कौशल्यावर आधारीत व्यवसाय या विषयाचा पेपर होता. सोमवारी सकाळी अकरा परभणी येथील प्रभारी शिक्षणाधिकारी संजय ससाणे, त्यांच्या पथकातील दोन महिला कर्मचाऱ्यांनी परीक्षा केंद्राची तपासणी केली. तीन पेपरमधील ३८ कॉपी बहाद्दर विद्यार्थ्यांना पकडण्यात आले. त्यांच्यावर निलंबनाची कारवाई करण्यात आली आहे.
दरम्यान, दुपारी उपशिक्षणाधिकारी व तालुका भरारी पथकाने कावलगाव येथील जय जवान जय किसान महाविद्यालय या परीक्षा केंद्रावर दुसऱ्या सत्रात राज्यशास्त्र पेपर सुरू असताना ३० विद्यार्थ्यांवर कारवाई केली आहे.