८१ हजार ७५० रुपयांची ५४५ किलो बर्फी ताब्यात
म. टा. प्रतिनिधी, पुणे
दिवाळी सणाच्या पार्श्वभूमीवर निर्भेळ अन्नाचा पुरवठा करण्यासाठी अन्न व औषध प्रशासनाकडून तपासणी सुरू करण्यात आली आहे. त्या तपासणीदरम्यान, पुणे जिल्ह्यातील इंदापूर तालुक्यातील निमगाव केतकी येथे भेसळीच्या संशयावरून ५४५ किलो वजनाची बर्फी जप्त करण्यात आली. ८१ हजार ७५० रुपयांचा साठा जप्त केला आहे.
निमगाव केतकी येथे महेश भरत फुटाने यांच्या मालकीच्या शुभम मिल्क प्रॉडक्ट्समध्ये भेसळयुक्त बर्फीचे उत्पादन घेऊन १० किलोच्या पिशव्यांमधून विक्री करीत असल्याची बातमी मिळाली. त्यानुसार अन्न व औषध प्रशासनाच्या (एफडीए) अधिकाऱ्यांनी छापा टाकला. त्या ठिकाणी दूध अगर खव्यापासून बर्फी तयार न करता रिफाइंड सूर्यफूल तेल, हायड्रोजिनेटेड व्हेजिटेबल फॅट (वनस्पती), स्कीम्ड मिल्क पावडरमध्ये साखर टाकून भेसळयुक्त बर्फी तयार केल्याचे आढळले.
संबंधित उत्पादकाला बर्फी उत्पादन बंद करण्याचे आदेश देण्यात आले. बर्फीचा नमुना घेऊन उर्वरित ८१ हजार ७५० रुपयांचा साठा जप्त करण्यात आला आहे. प्रभारी सहआयुक्त संपतराव देशमुख यांच्या मार्गदर्शनाखाली सहायक आय़ुक्त अर्जुन भुजबळ, अन्न सुरक्षा अधिकारी शुभांगी अंकुश यांच्या पथकाने ही कारवाई केली.