म. टा. प्रतिनिधी, पुणे
स्वमग्नता (ऑटिझम) या आजाराचे निदान आणि पुढील उपचार पद्धतींसाठी प्रसन्न ऑटिझम सेंटरतर्फे 'गोल्ड स्टँडर्ड ऑटिझम डायग्नॉस्टिक ऑब्जर्व्हेशन शेड्यूल टू' (एडीओएस टू) ही चाचणी उपलब्ध करण्यात आली आहे. ही चाचणी सर्वांत प्रगत असून यामध्ये बारा महिन्याच्या बोलू न शकणाऱ्या बाळापासून ते व्यवस्थित बोलणाऱ्या कोणत्याही वयोगटातील माणसांपर्यंत सर्वांना तिचा वापर करता येणार आहे, अशी माहिती सेंटरच्या संचालिका साधना गोडबोले यांनी पत्रकार परिषदेत दिली.
ऑटिझमचे निदान योग्य वेळेस झाल्यावर त्यावर उपचारही लवकर सुरू करता येतात. या अत्याधुनिक चाचणीतून व्यक्तीची संभाषण क्षमता, सामाजिक आंतरक्रिया, त्या व्यक्तीला कोणत्या विषयात कुतूहल आहे, याचे अचून निदान करता येते. यामुळे त्या व्यक्तीच्या अथवा मुलांच्या सर्वांगीण विकासाच्या दृष्टीने आवश्यक उपचारांची भविष्यातील दिशाही निश्चित करता येते. 'एडीओएस टू' ही चाचणी उपलब्ध करण्यासाठी कॅपसिलॉन सॉफ्टवेअर कंपनीने प्रसन्न ऑटिझम सेंटरला आर्थिक मदत उपलब्ध करून दिली आहे, असे गोडबोले आणि मृणाल ढोले यांनी सांगितले.
स्वमग्नता हा आजार नसून ही मुलांच्या वाढीच्या वयात दिसणारी एक गुंतागुंतीची समस्या आहे. स्वतःच्याच विश्वात सातत्याने रमणे म्हणजे स्वमग्नतेची स्थिती असे म्हणता येईल. ही मुले वास्तव परिस्थितीपासून अलिप्त राहतात. मुलांना स्वत:ला काय हवे आहे ते सांगताना अडचण येते. त्याचप्रमाणे आई-वडील, जवळपासचे लोक आपल्याला काय सांगतात, ते त्यांना समजत नाही. या मुलांसाठी प्रसन्न ऑटिझम सेंटर गेल्या वीस वर्षांपासून कार्यरत आहेत. सेंटरमध्ये त्यांच्या समस्या लक्षात घेऊन गरजेनुसार स्पीच थेरपी, नाच, चित्रबोली, ड्रम सर्कल थेरपी, व्यवसायोपचार पद्धती अशा विविध थेरपी घेतल्या जातात, अशी माहिती गोडबोले यांनी दिली.
०००
स्वमग्नता कशामुळे होते ?
- स्वमग्नतेस अनेकदा अनुवंशिकता कारण असते.
- गरोदरपणात मातेला दिली जाणारी काही विशिष्ट औषधे (वाढलेला रक्तदाब, मधुमेह)
- उशिरा संतती
- अल्कोहोलचे सेवन
- मातेचे कुपोषण किंवा प्रसूतिदरम्यान होणारी गुंतागुत