म. टा. प्रतिनिधी, पुणे
दिवाळीत किल्ले स्पर्धेत सहभागी होणाऱ्या मुलांना रोख स्वरूपात बक्षीस देण्याऐवजी थेट गडकिल्ल्यांची अभ्यास सहल आयोजित करून, ऐतिहासिक वारशाचे महत्त्व पटवून देण्याचा उपक्रम शिवसमर्थ प्रतिष्ठान आणि मृत्युंजय अमावस्या विचार मंचाच्या शिलेदारांतर्फे नुकताच राबविण्यात आला. या उपक्रमांतर्गत सिंहगड रस्ता परिसरातील ८५० मुलांनी जुन्नर तालुक्यातील शिवनेरी किल्ल्याला भेट दिली आणि छत्रपती शिवाजी महाराजांच्या जन्मस्थळाचे दर्शन घेतले. इतिहासाचा जागरही केला.
प्रतिष्ठान आणि मंचाच्या वतीने दर वर्षी 'दिवाळी किल्ले स्पर्धा' घेतली जाते. या स्पर्धेत सहभागी झालेल्या मुलांना रोख बक्षिसे देण्याऐवजी, त्यांना गडकिल्ल्यांवर नेऊन, इतिहासाची आवड रुजविण्याचा अभिनव उपक्रम या दोन्ही संस्थांनी हाती घेतला आहे. यंदा या उपक्रमाचे आठवे वर्ष होते. राष्ट्रीय स्वयंसेवक संघाचे महानगर कार्यवाह महेश करपे, आमदार माधुरी मिसाळ, संघाचे भाग कार्यवाह सचिन भोसले, भाजपचे प्रदेश सचिव राजेश पांडे, शहर सरचिटणीस उज्ज्वल केसकर, नगरसेविका मंजुषा नागपुरे, भाजपचे शहर पदाधिकारी दीपक नागपुरे यांच्या उपस्थितीत सिंहगड रस्त्यावरून ८५० मुले शिवनेरीच्या दिशेने रवाना झाली. दोन्ही संस्थांच्या १०० तरुण कार्यकर्त्यांच्या नेतृत्वाखाली या मुलांनी संपूर्ण किल्ला पाहिला. या वेळी इतिहास संशोधक प्रमोद बोराडे आणि मंचाचे नीलेश भिसे यांनी जुन्नर तालुका; तसेच किल्ल्याच्या इतिहासाची माहिती मुलांना दिली.
नव्या पिढीत गडकिल्ल्यांची आवड निर्माण व्हावी, त्यांना छत्रपती शिवाजी महाराजांचा इतिहास कळावा, यासाठी गेल्या आठ वर्षांपासून गडकिल्ल्यांवर अभ्यास सहल उपक्रम राबविण्यात येत आहे. या उपक्रमांतर्गत आतापर्यंत प्रतापगड, सज्जनगड, रायरेश्वर, पुरंदर, लोहगड या किल्ल्यावर अभ्यास सहल आयोजित करण्यात आली आहे.
- नीलेश भिसे, संयोजक