म. टा. प्रतिनिधी, पुणे
आगाखान पॅलेस येथील महात्मा गांधी यांच्या जीवनावर आधारित संग्रहालयाच्या नूतनीकरण व सुशोभीकरणाचे काम हाती घेण्यात आले आहे. त्यामुळे २० ऑगस्ट ते १ ऑक्टोबरपर्यंत आगाखान पॅलेस पर्यटकांसाठी बंद ठेवण्याचा निर्णय भारतीय पुरातत्त्व सर्वेक्षण विभागाने घेतला आहे, अशी माहिती विभागाच्या पुणे मंडळाचे संरक्षण सहायक गजानन मंडावरे यांनी दिली.
'सध्या आगाखान पॅलेसमध्ये तळमजल्यावर महात्मा गांधी यांचे संग्रहालय आहे. महिनाभराच्या कालावधीत या संग्रहालयाचा तळमजल्यासह पहिल्या व दुसऱ्या मजल्यावरही विस्तार करण्यात येणार आहे. त्यामध्ये गांधीजींच्या जीवनातील प्रसंग फायबर स्ट्रक्चरमध्ये साकारले जाणार आहेत. याशिवाय संग्रहालयाची विद्युत रोषणाईही केली जाणार आहे. महात्मा गांधी यांच्या दीडशेव्या जयंतीचे औचित्य साधून २ ऑक्टोबर रोजी या संग्रहालयाचे उद्घाटन केले जाईल,' असेही मंडावरे यांनी सांगितले.
---