म. टा. प्रतिनिधी, पुणे
मद्यविक्रीच्या दुकांनांसमोर रांगा लावणाऱ्या ग्राहकांसाठी राज्य सरकारने खुशखबर दिली आहे. राज्य सरकारने मद्याची 'होम डिलिव्हरी' देण्यास परवानगी दिली असून, घरपोच सेवा देण्याची जबाबदारी ही दुकानदारांवर टाकण्यात आली आहे. १४ मेपासून या आदेशाची अंमलबजावणी सुरू होणार आहे. मात्र, ही सेवा प्रतिबंधित क्षेत्रात अर्थात 'कंटेन्मेंट झोन'मध्ये दिली जाणार नाही.
मद्य विकत घेण्यासाठी दुकानांसमोर रांगा लागत असल्याने राज्य सरकारने घरपोच मद्य पुरविण्यास परवानगी देण्याचा निर्णय घेतला आहे. घरपोच सेवा देणाऱ्या कर्मचाऱ्यांची वैद्यकीय तपासणी करणे सक्तीचे असणार आहे. मद्य बाळगणे आणि वाहतूक करणे याची परवानगी राज्य उत्पादन शुल्क विभागाकडून दिली जाणार आहे. १४ मे रोजी सकाळी दहानंतर ही सेवा सुरू होणार आहे.
जिल्हाधिकारी किंवा महापालिका आयुक्त यांनी प्रतिबंधित क्षेत्र म्हणून घोषित केलेल्या भागात मद्याची घरपोच सेवा मिळणार नसल्याचे राज्य उत्पादन शुल्क विभागाकडून सांगण्यात आले. घरपोच मद्य पुरविणाऱ्या कर्मचाऱ्यांची वैद्यकीय तपासणी, ओळखपत्र; तसेच मद्य बाळगणे, वाहतूक करणे यासाठी परवानगी देण्यासाठी एक दिवसाचा कालावधी लागणार असल्याने १४ मे रोजी सकाळी दहा वाजल्यानंतर या निर्णयाची अंमलबजावणी होणार असल्याचे राज्य उत्पादन शुल्क विभागाकडून स्पष्ट करण्यात आले.
……
ई-टोकनलाही 'चीअर्स'
राज्य उत्पादन शुल्क विभागाने मद्य खरेदी करणाऱ्यांसाठी ई-टोकन सुविधा उपलब्ध केली आहे. www.mahaexcise.com या वेबसाइटवर ही सुविधा देण्यात आली आहे. संबंधितांनी नाव, मोबाइल क्रमांक ही माहिती भरल्यानंतर कोणत्या दुकानातून खरेदी करायची आहे, ते दुकान आणि उपलब्ध असलेली वेळ निवडल्यावर ई- टोकन प्राप्त होते. ई-टोकन घेण्यासाठी भरघोस प्रतिसाद असल्याचे राज्य उत्पादन शुल्क विभागाकडून सांगण्यात आले.
कोट
घरपोच मद्य पुरवठा करण्याच्या आदेशाची अंमलबजावणी कशी करायची, याबाबत आयुक्त कार्यालयाकडून सूचना दिल्या जाणार आहेत. त्यानुसार मद्य बाळगणे आणि वाहतूक करणे याबाबत परवानगी देण्याची कार्यवाही सुरू केली जाणार आहे.
- संतोष झगडे, अधीक्षक, राज्य उत्पादन शुल्क विभाग