म. टा. प्रतिनिधी, पुणे
गणेश विसर्जन मिरवणुकीमध्ये भर रस्त्यात मद्यपान करून धांगडधिंगा करणाऱ्यांची संख्या वाढत असताना त्यांच्यावर काहीही कारवाई होताना दिसत नाही. पोलिसांच्या रेकॉर्डवर दारुबंदी कायद्यानुसार विसर्जन मिरवणुकीच्या दिवशी फक्त एकच गुन्हा दाखल करण्यात आला आहे. तर, शहरात अनेक ठिकाणी मद्यपानाची विक्री सुरू असताना राज्य उत्पादन शुल्क विभाग अनभिज्ञ होता. मद्यविक्री करणारे व मद्यपान करणारे याकडे दोन्हींकडे दुर्लक्ष केल्याचे दिसून आले.
पुण्याची गणेश विसर्जन मिरवणूक ही राज्यातील नागरिकांचे आकर्षण असते. ही मिरवणूक पाहण्यासाठी विविध शहरांतून नागरिक पुण्यात येतात. पण, गेल्या काही काळात पुण्यातील विसर्जन मिरवणुकीमध्ये मद्यपान करून येणाऱ्यांची संख्या दिवसेंदिवस वाढत आहे. विसर्जन मिरवणुकीचा दिवस हा 'ड्राय डे' असतो. तरीही मद्यपान करणाऱ्यांना या दिवशी सहज मद्य मिळताना दिसते. शहरात अनेक ठिकाणी छोट्या गल्ल्यांमध्ये काही ठिकाणी मद्याची विक्री होत होती. मद्यपान केलेल्यांकडून मिरवणुकीमध्ये धांगडधिंगा घातला जात होता. तसेच, शहराच्या उपनगरांमध्येदेखील विसर्जन मिरवणुकीमध्ये अनेक जण मद्यपान करून आल्याचे दिसले. मद्यपान करणाऱ्या व्यक्तींकडून काही ठिकाणी विनाकारण वादावादीचे प्रकारदेखील झाले. त्यामुळे सर्वसामान्य नागरिकांना मद्यपान करणाऱ्यांचा त्रास झाला.
मात्र, ही स्थिती असतानाही मिरवणुकीमध्ये मद्यपी व मद्य विक्रेत्यांवर पोलिस व राज्य उत्पादन शुल्क विभागाकडून काहीही कारवाई होताना दिसली नाही. या वर्षी विसर्जन मिरवणुकीच्या दिवशी पोलिसांच्या दप्तरी फक्त एका गुन्ह्यांची नोंद झालेली दिसत आहे; तर राज्य उत्पादन शुल्क विभागाकडून काहीही कारवाई झालेली नसल्याचे दिसून आले. मद्यविक्री होत असेल, तर माहिती कळविण्याचे आवाहन राज्य उत्पादन शुल्क विभागाकडून करण्यात आले होते. पण, विभागाला कोठेही मद्यविक्री होताना दिसली नाही, हे विशेष. या प्रकाराकडे पोलिस व राज्य उत्पादन शुल्क विभागाकडून सोयीस्कर दुर्लक्ष केले जात असल्याची चर्चा नागरिकांमध्ये होती.
-----------
'पोलिसांचा भर कायदा-सुव्यवस्थेवर'
एका वरिष्ठ पोलिस अधिकाऱ्याने सांगितले, की विसर्जन मिरवणुकीमध्ये मद्यपान करून येणाऱ्यांचे प्रमाण वाढत आहे. मद्याची विक्री होऊ नये म्हणून विशेष काळजी घेतली जात नाही. त्यामुळे हे प्रमाण वाढत आहे. कायदा-सुव्यवस्था राखणे यालाच विसर्जनाच्या दिवशी पोलिसांकडून प्राधान्य दिले जाते. त्यामुळे मद्यपान व मद्यविक्री करणाऱ्यांवर पोलिसांना कारवाई करणे शक्य होत नाही.