वेळप्रसंगी पेट्रोल पंप बंद करू

पेट्रोल डीलर्स असोसिएशनचा सरकारला इशारा

म. टा. प्रतिनिधी, पुणे

हेल्मेट नसल्यास पेट्रोल नाही, या निर्णयाची अंमलबजावणी करणे शक्यच नाही. वेळप्रसंगी सर्व पेट्रोलपंप बंद ठेवून आंदोलन करू असा इशारा पुणे पेट्रोल डीलर्स असोसिएशनने दिला आहे. असोसिएशनच्या सदस्यांशी चर्चा करून लवकरच त्याबाबत निर्णय घेतला जाईल, असे प्रवक्ते अली दारूवाला यांनी शुक्रवारी सांगितले.
हेल्मेट नसेल तर दुचाकीचालकांना पेट्रोल न देण्याच्या राज्य सरकारच्या निर्णयाला पुणे पेट्रोल डीलर्स असोसिएशनने तीव्र विरोध केला आहे. ‘हेल्मेटसक्तीची अंमलबजावणी करण्याचे काम पेट्रोल पंपचालकांवर टाकण्याऐवजी जनजागृती करण्याची अथवा अन्य पर्याय शोधण्याची मागणी असोसिएशनने केली आहे. राज्य सरकारच्या आदेशानुसार विनाहेल्मेट दुचाकीचालकांना पेट्रोल दिल्यास पेट्रोलपंप चालकांवर कारवाई केली जाणार असेल, तर ही आमच्यासाठी चिंताजनक बाब आहे. यामुळे आमच्या व्यवसायावर परिणाम होईल,’ असे दारूवाला यांनी सांगितले.
पुणेकरांनी यापूर्वी सातत्याने हेल्मेटसक्तीला विरोध केला आहे. त्यामुळे या निर्णयाचे ते किती पालन करतील हे माहीत नाही. बाटलीमध्ये पेट्रोल दिले जात नाही, म्हणून पेट्रोल पंपावर वाद घातले जातात. हेल्मेट न घालता, गाडीत पेट्रोल टाकण्यासाठी येणाऱ्यांची संख्या मोठी आहे. एवढ्या मोठ्या प्रमाणावरील वाह चालकांना पेट्रोलसाठी नाही म्हटल्यास काय परिस्थिती निर्माहा होईल, याची कल्पनाच करवत नाही. त्याचे जे काही पडसाद उमटतील त्याची जबाबदारी सरकार घेणार का, असा प्रश्न पेट्रोल पंपचालकांनी उपस्थित केला आहे.
व्यावसायामुळे पंपचालकांना या नियमाची अंमलबजावणी करणे शक्य नाही. भविष्यात वाहन चालविण्याचा परवाना, पीयूसी नसलेल्या आणि मद्यपान करून गाडी चालविणाऱ्या व्यक्तींची तपासणी केल्याशिवाय पेट्रोल द्यायचे नाही, असाही निर्णय घेतला जाऊ शकतो. पंपचालकांनी पेट्रोल विक्री सोडून नियमांची अंमलबजावणी करायची का असाही प्रश्न संघटनेने उपस्थित केला आहे.